Сайыҥҥы өттүгэр куурусса ииттэр табыгастааҕынан өрөспүүбүлүкэ нэһилиэктэринэн куурусса бөҕө тарҕанна.
Томпо оройуонугар эрдэттэн сайаапка хомуллан, нэһилиэк дьонун кэтэх хаһаайыстыбаларыгар ииттэллэригэр, тыа хаһаайыстыбатын салалтата сылын аайы сымыыттыы сылдьар кууруссалары, Дьокуускайдааҕы көтөрү иитэр фабрикаттан дуогабардаһан тутатына аҕалтараллара үгэскэ кубулуйда.
Ол курдук, быйыл 1841 кууруссаны аҕалан нэһилиэктэринэн тарҕаттылар. Нэһилиэк дьоно-сэргэтэ үөрэ-көтө кууруссаны ииттээри хамаҕатык атыыласта.
Бу нэһилиэк олохтоохторун туһугар, кинилэр сибиэһэй сымыыттарынан аһаатыннар-сиэтиннэр диэн олохтоох дьаһалта өттүттэн босхо тиэйтэрэн аҕалан түҥэтэллэрэ махталлаах суол.
Сыаната да сөбүгэр соҕус. Билигин сыана ыарыы турар кэмигэр, хас биирдии тыа ыалыгар улахан көмө буолара саарбаҕа суох. Кууруссалары этэҥҥэ тиэйэн аҕалбыт суоппарга Леонид Тарабукиҥҥа оройуон олохтоохторо улахан махталларын тиэрдэллэр.
Мария Захарова