Олунньу 19 күнүгэр Герой Сэбиэскэй Сойуус Геройа Федор Матвеевич Охлопков аатынан Кириэс-Халдьаайы орто оскуолатыгар судаарыстыбаннай уонна бэлитииическэй диэйэтэл Васильев Степан Васильевич төрөөбүтэ 130 сылыгар аналлаах VI-c өрөспүүбүлүкэтээҕи «Басхан-2026» дьыалабыай оонньуу муниципальнай түһүмэҕэ үрдүк таһымнаахтык ыытылынна.
Күрэх сүрүн сыалынан-соругунан уол оҕону сахалыы сиэр-майгы, өй-санаа өттүнэн сайыннарыы, киэҥ эйгэҕэ таһаарыы, билиһиннэрии, уопсастыбаҕа уол оҕо оруолун үрдэтии, түмэр-салайар дьоҕурун үүннэрии, бэйэ-бэйэлэригэр истиҥ доҕордуу сыһыаны үөскэтии, төрөөбүт дойдуга үтүө сыһыаҥҥа, тапталга иитии буолар.Тэрээһиҥҥэ барыта уон басхан «Удьуор утума», «Дойду салайааччылара мин тус бэйэр көрүүбүнэн», «Өркөн өй», дебат, «Айыы умсулҕана» түһүмэхтэринэн тургутууну ааһан ситиһиилээхтик кытыннылар.
Дьүүллүүр Сүбэҕэ Винокурова Е.К., үөрэҕирии салалтатын иитэр үлэҕэ уонна эбии үөрэхтээһиҥҥэ салаа салайааччыта, Павлов А.А., оройуон Сэбиэтин депутата, Мярин А.Х., Саһыл орто оскуолатын Аҕа Сүбэтин чилиэнэ, Рафаилов А.С., Байаҕантай нэһилиэгин баһылыгын солбуйааччы үлэлээтилэр. «Удьуор утума» түһүмэххэ Булдаков Ярослав, Тарабукин Долун, Никитин Руслан (Саһыл орто оскуолата), Бурцев Владимир (Кириэс-Халдьаайы орто оскуолата) төрүттэрин-уустарын, удьуордарын утумун сиhилии кэпсээн инники күөҥҥэ таҕыстылар.«Дойду салайааччылара мин тус бэйэр көрүүбүнэн» түһүмэххэ кыттааччылар саха аптаныамыйатын төрүттээччилэр, «Саха саарыннара» гражданскай-патриотическай бырагырааммаҕа киирбит уһулуччулаах дьон үлэлэрин-хамнастарын туһунан, кинилэр устуоруйаҕа суолталарын, сабыдыалларын ырытан, бэйэлэрин көрүүлэрин, санааларын киэҥник эттилэр. «Өркөн өй» – блиц-ыйытыыларга Комиссаров Роман (Саһыл орто оскуолата) барыларыттан сөптөөх эппиэти биэрэн чорбойон таҕыста. Байаҕантай нэһилиэгин баһылыгын солбуйааччытыттан Рафаилов А.С. анал бириис ылла. Дебат күрэҕэр уолаттар икки хамаандаҕа арахсан «Цифровизация үөрэх эйгэтигэр туһата уонна мөкү өрүттэрэ» диэн тиэмэҕэ сөпсөһөр уонна сөпсөспөт хайысхаларынан ырытыhан көрөөччүлэргэ киэҥ сэҥээриини таhаардылар.«Айыы умсулҕана» түһүмэххэ хоһоон устуруокатын тутатына ситэрэн, салҕаан айарга холонон көрдүлэр. Айбыт хоһооннорун уустаан-ураннаан ааҕан иһитиннэрдилэр.
Дьыалабыай оонньуу түмүгүнэн хас биирдии басхаҥҥа анал аат иҥэрилиннэ. Ол курдук, «Кыайыыга дьулуур» — Баланов Саяҥҥа ( 8 кылаас, Арыы Толоон сүрүн оскуолата), «Кэскиллээх кыттааччы» — Степанов Власийга (8 кылаас, Арыы Толоон сүрүн оскуолата), «Сайдам санаа басхана» — Неймохов Володяҕа (9 кылаас, Кириэс-Халдьаайы орто оскуолата), «Кэрэхсэбиллээх кыттааччы» — Охлопков Айсарга (9 кылаас, Кириэс-Халдьаайы орто оскуолата), «Ылыннарыылаах тыл басхана» — Никитин Руслаҥҥа (9 кылаас, Саһыл орто оскуолата), «Өркөн өй басхана» — Комиссаров Ромаҕа(9 кылаас, Саһыл орто оскуолата), «Айар куттаах басхан» — Тарабукин Долуҥҥа (9 кылаас, Саһыл орто оскуолата), «Тобуллаҕас толкуй басхана» — Христофоров Данилга (11 кылаас, Мэҥэ Алдан орто оскуолата), «Киэҥ көрүүлээх басхан» — Булдаков Ярославка(9 кылаас, Саһыл орто оскуолата), «Удьуор утума салҕыыр басхан» — Бурцев Владимирга (9 кылаас, Кириэс-Халдьаайы орто оскуолата) туттарыннылар. Муҥутуур кыайыылааҕынан Булдаков Ярослав ааттанна. Оройуон Сэбиэтин депутата Павлов А.А. бэйэтин анал бирииһин Бурцев Владимирга туттарда.
Күрэҕи Кириэс-Халдьаайы орто оскуолатын дириэктэри иитэр үлэҕэ солбуйааччы Габышева М.П. иилээн-саҕалаан ыытта. Уол оҕо- норуот кэскилэ. Норуот дьылҕата, сырдык ыра санаата уолаттартан тутулуктаах.
Лена Слепцова