Тохсунньу 25 күнүгэр Арассыыйаҕа устудьуон күнүн бэлиэтииллэр. История кэпсииринэн, 1755 сыллаахха бу күн ыраахтааҕы Елизавета Петровна ыйааҕынан, Москубаҕа университет арыллыбыт. Ол оруобуна Сибэтиэй Татьяна күнүгэр сөп түбэспит. Онон Татьяна күнэ Арассыыйаҕа Устудьуоннар күннэринэн биллэриллибит. Онон бүгүн —устудьуоннар уонна Татыйыына диэн ааттаах кэрэ аңардар бырааhынньыктара.
Бу күн Хаандыга Хайа геологиятын устудьуоннарыгар «Зачетная вечеринка» диэн бэрт сэргэх куонкурус буолла. Тэрээһини ОПИ-24 группа кыргыттара Полина Мошкова уонна Анастасия Зайкова иилээн-саҕалаан ыыттылар.
Дьүүллүүр сүбэҕэ дириэктэри үөрэтэр-иитэр үлэҕэ солбуйааччы Людмила Викторовна Миронова уонна “Томпо оройуона” МТ, “Бастыҥнар хамсааһыннара” оройуоннааҕы тэриллии исписэлииһэ Марина Дмитриевна Рожина.
Күрэххэ биэс хамаанда кытынна.
Бастакы түһүмэх — бэйэни билиһиннэрии. Ол кэнниттэн хамаандалар «Зачетно» диэн викторинаны аастылар. Салгыы хас биирдии группа дьиэҕэ үлэтин устудьуон күнүгэр аналлаах туруорууну (инсценировка) көрдөрдүлэр. Бүтэһик түһүмэххэ «Музыкальное лото» оонньоотулар.
Күрэх түмүгүнэн, бастакы миэстэ — ОПИ-24, иккис — ОПИ-23, ОГР-24 группалара ыллылар.
Бу курдук бэрт көрдөөх, бэһиэлэй тэрээһин буолла.
Мария Захарова