Олунньу 14 күнүгэр олохтоох библиотека, Н. И. Колодезников аатынан сынньалаҥ киинин уонна Е. П. Неймохов аатынан литэрэтиирэни уонна кыраайы үөрэтэр түмэл үлэһиттэрэ Ийэ тыл, сурук-бичик күнүгэр аналлаах «Сахалыы КВИЗ» оонньууну оонньоттулар. Манна барыта 4-5 киһилээх түөрт хамаанда кытынна. Е. П. Неймохов аатынан Мэҥэ Алдан орто оскуолатын үлэһиттэрэ туора турбаккабыт бэйэбит хамаанда тэринэн көхтөөхпүтүн биллэрдибит. Ол курдук, хамаандабыт сырдыгы эрэ сахтын диэн «Сардаҥа» диэн ааттанныбыт.
Атын хамаандалар эмиэ «Кустук», «Чолбон», «Таптал» диэн сахалыы олус кэрэ ааттаахтар.
Оонньуубут интэриэһинэй түһүмэхтэрдээх буолан биэрдэ.
Сомоҕо домохтору, өс хоһооннору, саха литэрэтиирэтин суруйааччыларын, поэттарын, киһи аан туомун, сахалыы киинэлэри, ырыалар ааптардарын таайан уонна да араас ыйытыктарга бириэмэҕэ хоруйдаан илин-кэлин түһүстүбүт.
Сахабыт тыла олус баайын, дириҥин бары да бэккэ билэр, төрөөбүт төрүт тылбытын ис сүрэхпитинэн таптыыр буоламмыт бэккэ табыллан кыттаммыт, бары кэлбит хамаандалартан чорбойоммут «Кылаан чыпчаал» үрдүк аатын сүктүбүт.
Ону таһынан, олохтоох музей анал бирииһин саамай актыыбынай кыттааччыга Татьяна Прокопьевна Захароваҕа туттаран үөрүүбүт өссө төгүл үрдээн тарҕастыбыт.
Маннык күрэхтэртэн киһи элбэххэ үөрэнэр, саҥаны билэр.
Сахабыт тыла үйэлэргэ сүппэккэ сатарыы турдун диэн баҕа санаабытын этэбит.
Тэрийээччилэргэ барҕа махталбытын тиэрдэбит.
Татьяна Захарова