Муус устар 3 күнүгэр, Хаандыга модельнай библиотекатыгар, саха норуотун олоҥхотун, үгэһин уонна аныгы кэм цифровой живопиһын ньыматынан арыйар, талааннаах уруһуйдьут Туйаара Стручкова персональнай быыстапката буолан ааста.
Бу күн библиотека саалатыгар кэлбит дьон сахалыы мифология дириҥ эйгэтигэр уйдаран, ураты кэрэ уонна тыыннаах уруһуйдары көрөн дуоһуйдулар. Туйаара Стручкова — идэтинэн устуорук, норуот төрүт култууратын чинчийэр, айар үлэтигэр сакральнай дьахтар дьүһүлгэнин уонна ис күүстээх айар уопутун киллэрэр талааннаах уруһуйдьут. Кини Дьокуускай куоракка «Россия — Моя История» историческай пааркаҕа ыытыллыбыт «Айыы айыллыыта» (Творение Айыы) бырайыак ааптара буолар. Бу быыстапкаҕа саха норуотун олоххо көрүүтүн арыйар 64-тэн тахса цифровой уонна анимационнай үлэлэр көрдөрүллэн, 1200-тэн тахса киһи сылдьыбыта.
Быыстапка арыллыытыгар Туйаара Стручкова бэйэтэ кэлэн, дьону кытта истиҥник кэпсэттэ. Кини бэйэтин үлэлэрин туһунан кэпсииригэр: «Мин үлэлэрим былыргы мифтэри аныгы кэм цифровой живопиһын ньыматынан саҥаттан арыйар, ол иһин көрөөччүгэ бэрт чугас, ураты тыыннаах буолуохтаах», — диэн бэлиэтээтэ.
Тэрээһин бырагыраамата олус сэргэх буолла: Көрөөччүлэр холст уонна цифровой үлэлэри көрүүлэрин таһынан, ааптар саха мифологиятын, Айыылар кэпсээннэрин туһунан сэһэргээбитэ кэскиллээх суолтанна. Ону таһынан, «Дьол кыната» ааптар бааннарыгар хаартыскаҕа түһүү, ааптар уруһуйдарын («Дьиҥ», «Көҥүл») өҥнөөх харандааһынан ойуулааһын (мастер-класс) оҕо-аймах уонна улахан дьон сэҥээриитин ыллылар.
Тэрээһин түмүгэр модельнай библиотека дириэктэрэ Елена Колодезникова тыл эттэ. Кини Туйаара Стручковаҕа кэлэн барбытыгар, ону таһынан саха норуотун ускуустубатын сайдыытыгар киллэрбит улахан кылаатын иһин дириҥ махталын биллэрдэ. Туйаара талааннаах айар үлэтин үрдүктүк сыаналаан, киниэхэ анал бэлэҕи туттарда.
Бу күн библиотекаҕа кэлбит хас биирдии киһи Туйаара Стручкова айар үлэтин үрдүктүк сыаналаата. Көрөөччүлэр уруһуйдьуту кытта кэпсэтэн, норуот төрүт култууратын, мифологиятын саҥа хараҕынан көрөн, ис дууһаларын байытан тарҕастылар.
Эрэдээксийэттэн: Туйаара Стручкова маннык таһымнаах быыстапката Хаандыга олохтоохторун култууралыы олоҕор умнуллубат түгэн буолла.
Мария Захарова