Ахсынньы 22 күнүгэр Мэҥэ Алдаҥҥа бэйэни салайыныы уорганнарын отчуота буолла.
Баһылык бастакы солбуйааччыта Степан Кривошапкин Томпо оройуонун дьаһалтатын сыллааҕы үлэтин кэпсээтэ. Инники соруктары, общественнай ситиһиилэри, хамсааһыннары хабан киэҥ ис хоһоонноох дакылааты оҥордо.
Оройуон олоҕун-дьаһаҕын бары эйгэтин хабан, ааспыт сыл түмүктэрин билиһиннэрдэ. Ол курдук, 2025 сылга нэһилиэнньэ хамсааһыныгар (демография), экономикаҕа, урбаан эйгэтигэр, ОДьКХ, тыа хаһаайыстыбатыгар, үөрэхтээһиҥҥэ, промышленноска уонна култуураҕа оройуон ситиһиилэрин, ону тэҥэ 2026 сылга ыытыллыахтаах былааннары иһитиннэрдэ.
Салайааччы Арассыыйаҕа Аҕа дойду көмүскээччилэрин сылын, Саха сиригэр Ийэ дойду көмүскээччилэрин сылын уонна Томпо улууһугар Өйдөбүнньүк уонна сомоҕолоһуу сылын ыытыыга Томпо олохтоохторо көхтөөхтөрүн бэлиэтээтэ.
Сүнньүнэн 1941-1945 сс. Аҕа дойду сэриитигэр Улуу Кыайыы 80 сылыгар анаммыт үбүлүөйдээх сыл дьоһуннук ааста. Ким да умнуллубат, туох да умнуллубат!
2026 сыл Арассыыйаҕа Норуоттар сомоҕолоһууларын сылынан, онтон Саха Өрөспүүбүлүкэтигэр Култуура сылынан биллэриллибитэ.
Анал байыаннай дьайыы кыттыылаахтарыгар уонна кинилэр дьиэ-кэргэттэригэр ураты болҕомто ууруллар. Анал категорияларынан материальнай өйөбүл оҥоһуллар. Маны таһынан анал тиэхиньикэ уонна үрдүк технологиялаах тэрил ылыллар. Ол курдук, 2025 сылга 32 мөлүйүөн солкуобай анаммыт.
Степан Кривошапкин биир дойдулаах буойуттарга үтүө санаанан көмөлөспүт нэһилиэк салалтатыгар уонна олохтоохторугар махтал тылларын эттэ.
Дакылаат кэннэ тута ыйытыктарга, этиилэргэ киирдилэр. Мэҥэ Алдаҥҥа хаарбах дьиэттэн көһөрүү бырагырааматынан 29 кыбартыыра үһүс этапка (2026-2030 сс.) уочаракка турарынан, манна туох, хайдах үлэ ыытыллыан нэһилиэк баһылыгын уонна олохтоохторун биир сытыытык турар боппуруостарынан буолла. Бу ыйытыыга Степан Александрович Тутуу министиэристибэтэ 2025 сыллааҕы үлэтэ бүтэ илигин, саҥа үүммүт сылга ыытыллар үлэ усулуобуйата хайдах буоларын кэтэһэбит диэтэ.
Ыйытыыларга киирдэххэ, нулевойтан Саһыл нэһилиэгэр диэри туоруур паром расписаниетын тутуспатын, Мэҥэ Алдан биэрэгиттэн Кириэс Халдьаайыга диэри сылдьар паром миэстэтэ уларыйыан сөбүн, эбэтэр “Чистый берег” бырайыагынан, дьон сынньанар сирин тутуута барыа дуо диэн ыйыттылар.
Ааспыт сыл бэс ыйыгар эргэ котельнай уонна гараж көтүрүллүүтэ ыытыллыбатаҕын олохтоохтор санаттылар. Манна саҥа сылга былааҥҥа турарын, онно харчы көрүллүүтүттэн тутулуктааҕын Томпотооҕу ОДьХк сүрүннүүр инженерэ Руслан Муталимцев эттэ.
Ону таһынан, оскуола капитальнай өрөмүөнүн, кабинеттар парталарын, олоппосторун, остолобуой техникатын саҥардар баҕалаахтарын эттилэр. Кулууп тымныытын, саҥа кулууп тутулларын, сыбаалка боппуруостарын көтөхтүлэр. Оҕо саадын капитальнай өрөмүөнэ ыытылларын, ассенизаторскай массыына ылыытыгар көмө оҥоһуллара буоллар диэн санааларын эттилэр.
Мария Моякунова пекарняны ититиигэ уонна уокка, үлэһиттэригэр хамнас төлөбүр оҥороругар «Возмещение затраты» диэн көмө харчы оҥороргут буоллар диэн көрдөстө. Оройуоҥҥа пекарь штата көрүллэрэ буоллар диэн баҕа санаатын эттэ.
Отчет кэннэ Степан Александрович наҕараада туттарда.
Үөрэх эйгэтигэр Томпо оройуонун баһылыгын анал бириэмийэтин иһин конкурс кыайыылааҕар — «Кыымчаан» оҕо саадын иитээччитэ Е.А. Сухомясоваҕа диплом туттарда.
Мэҥэ Алданнааҕы Е. Неймохов аатынан кыраайы үөрэтэр литературнай түмэл специалиһа А.П. Ефремова 65 сааһын туолар үбүлүөйдээх сылынан уһун, үтүө суобастаах үлэтин, Томпо оройуонун историятын, култууратын үөрэтиигэ кылаатын иһин Бочуоттаах грамотанан уонна хары чаһытынан наҕараадаланна.
РФ үлэтин бэтэрээнэ Е.А. Кривошапкин 85 сааһын туолар үбүлүөйдээх сылынан үөрэх, култуура сайдыытыгар тус кылаатын, уһун, үтүө суобастаах үлэтин, нэһилиэк общественнай олоҕор актыыбынай кыттыытын иһин Томпо оройуонун баһылыгын Бочуоттаах грамотатынан уонна хары чаһытынан наҕараадаланна.
Дьэ ити курдук, ыйытыылар да этиилэр да киирдилэр, онно сөптөөх хоруйдар да бардылар. Мунньахха этиллибит үгүс боппуруостар олунньуга салгыы Бырабыыталыстыба отчуотугар туруохтара.
Мария Захарова