Хаһан эрэ көрбүтүм
Кийиит кыыс кэлэрин…
Кыыс кыыс курдуга
Мааны да этэ.
Мэҥэ Алдан сэлиэнньэтигэр Үрүҥ тунах ыhыах күнүгэр Н.И.Колодезников аатынан култуура дьиэтигэр түөлбэлэр икки ардыларыгар «Кэрэ кийиит» күрэс ыытылынна. Тэрээһин сүрүн сыалынан дьиэ кэргэн сахалыы үгэһин өйөөһүн, тарҕатыы, дьиэ кэргэн, аймах сомоҕолоһуутун, түмсүүлээх буолуутун сайыннарыы, чөл туруктаах буолууну пропагандалааһын, кэлэр көлүөнэни сырдык санааҕа, кэрэ эйгэҕэ уһуйуу буолла.
Күрэс түөрт түһүмэҕинэн ыытылынна. Ол курдук, мааны кийииттэр «Өбүгэ ситимин утума» бэйэни билиһиннэрии, «Үтүө ыал ийэтэ — үтүө дьон үөрүүтэ» дьоҕуру көрдөрүү, «Саха кэскилэ» билиҥҥи үйэҕэ саха дьахтарын оруолун туhунан санаа атастаһыы, «Удьуор утума» авангарднай муода түһүмэхтэринэн тургутууну аастылар. «Сарыал» түөлбэттэн Мотрена Комиссарова, Вероника Гоголева «Чараҥ» түөлбэттэн Александра Захарова, «Алдан» түөлбэттэн Нарыйа Филатова кытыннылар. Дьүүллүүр сүбэҕэ Д.К.Сивцев – Суорун Омоллоон аатынан Опера уонна балет театрын солиhа Егор Колодезников, Хаандыга орто оскуолатын саха кылааhын учуутала Мария Чекурова, үөрэх салалтатын иитэр үлэҕэ салайааччыта Елена Винокурова үлэлээтилэр.
Күрэс саҕаланыытыгар эстрада чаҕылхай сулуhа Кылаан Кындыл «Саха кыыһа» ырыатын толоруутугар нарын — намчы кийииттэр хааман киирдилэр. Бэйэни билиһиннэриигэ кыттааччылар хантан хаанннаахтарын, кимтэн кииннээхтэрин, кэрэ кийиит буолан, Мэҥэ-Алдан сиригэр бур-буруо таһааран, ким удьуор утумун үксэтэн, кэҥэтэн олороллорун билиһиннэрдилэр.
Иккис түһүмэххэ талба талааҥҥа бигэнэн иэйиилээх ырыаларын, эрчимнээх үҥкүүлэрин, сылаас илиилэринэн оҥорбут оҥоһуктарын көрдөрдүлэр. Александра Захарова хомуска оонньоон, Нарыйа Филатова улахан уолунаан Айсиэнниин ырыа толорон, Мотрена Комиссарова кэргэнэ Юрийдыын вальс үҥкүүлээн, Вероника Гоголева дьүөгэ кыргыттарынаан дьиэрэҥкэй тэбэн көрөөччүлэр харахтарын сымнаттылар.
Үһүс түһүмэххэ «Саха кэскилэ» билиҥҥи үйэҕэ саха дьахтарын оруолун туhунан санаа атастастылар. Бүтэһик түһүмэххэ килбик кийииттэр бэйэлэрин төрөөбүт дойдуларын Александра Захарова Таатта Баайаҕатын Моҕол ураhатын, Мотрена Комиссарова Мэҥэ Хаҥалас Суола үрэҕин, Нарыйа Филатова Горнай улууhyн кырсаада сибэккитин, аар тайҕа сүдү кыылын тайаҕын, Вероника Гоголева Уус Алдан уолан бүппэт уулардаах алаастарын кэрэ көстүүтүн оһуор анньан, киэргэнэн — симэнэн көрөөччүлэр ытыс тыастарыгар тахсан хаамтылар.
Бу дьоро киэһэҕэ Кылаан Кындыл, Егор Колодезников, Елена Степанова, Фая Готовцева, Виктория Мекюрдянова истиҥ ырыаларын бэлэх ууннулар. Дьүүллүүр сүбэ быһаарыытынан «Уран кийиит» анал ааты Александра Захарова, «Сайдам кийиит» анал ааты Мотрена Комиссарова, «Талба кийиит» анал ааты Нарыйа Филатова ыллылар. Муҥутуур кыайылааҕынан «Кэрэ кийиит» үрдүк аатын «Сарыал» түөлбэ олохтооҕо, элбэх оҕолоох эдэр ийэ Вероника Гоголева буолан култуура дьиэтин аатыттан телевизор бэлэх тутта. Түөлбэ аатыттан кыттыбыт кэрэ кийииттэри түөлбэ салайааччылара, дьиэ кэргэттэрэ, чугас аймахтара эҕэрдэ тыллары этэн сибэкки дьөрбөтүн, сэмэй бэлэхтэри туттардылар. Күрэhи култуура дьиэтин салайааччыта Елена Геннадьевна Степанова иилээн ыытта. Мэҥэ Алдан кэрэ аҥаардарын, килбик кийииттэрин өссө төгүл бу киэһэни киэргэтэн, кэрэни бэлэхтээбиккитигэр махтанан туран, ситиһиилэри, дьиэ кэргэҥҥитигэр дьолу баҕарабыт.
Кыайыылаах Вероника Гоголева дьиэ кэргэнинээн
Вероника Гоголева
Мотрена Комиссарова
Нарыйа Филатова
Александра Захарова
Лена Слепцова