«Култуура – омук тыына» дииллэр. Бу тыыннаах эйгэҕэ бэйэтин олоҕун анаан, 45 сыл устата үлэлии-хамсыы сылдьар Мэҥэ Алданнааҕы Н.И. Колодезников аатынан култуура дьиэтин дириэктэрэ, СӨ култууратын туйгуна, РФ култууратын туйгуна Елена Степанова.
— Елена Геннадиевна, сэһэргэһиибитин саҕалыах. 45 сыл – култуура эйгэтигэр олус уһун, киэҥ суол дии?
— Дьиҥэр, үлэбин 1981 сыллаахха Ороһу нэһилиэгэр худругунан саҕалаабытым. Быйыл Култуура эйгэтигэр киирбитим 45 сыла туолла, онтон дириэктэринэн үлэлээбитим 20 сылым буолла. Бу уһун кэм устата элбэх уларыйыыны, элбэх сырдык түгэннэри көрсүбүппүн.
— Олоҕуҥ аргыһа Александр Макарович эмиэ култуура эйгэтин үлэһитэ этэ…
— Кырдьык оннук. Александр Макаровичтыын 27 сыл бииргэ олорбуппут. Кини биир тарбахха баттанар профессионал баянист, өр сыл музыкальнай оскуола дириэктэринэн үлэлээбитэ. Биһиги дьиэ кэргэн буолуубут 1981 сыллаахха «Аккорд» стройотрядка сыһыаннаах. 30-ча оҕо кэлэн күрүө туппуттара, ол онно билсэн холбоһон, ыал буолан биэс оҕолонон, бары үлэһит дьоһун дьоннор, сиэннэрбит ыллаан-туойан ситиһиилэрэ элбэх. Саамай кырабыт Куо-Миа Санкт-Петербург куоракка «Актер драмы и кино» диэн специальноска үөрэммитэ. Билигин Арктическай университекка режиссер үөрэҕэр үөрэнэр. Култуура эйгэтин кини эрэ утумнаата.
— 20 сыл дириэктэрдээбит кэмиҥ тухары култуура дьиэтин материальнай базата хайдах уларыйда?
— Мэҥэ Алдаҥҥа Арчы дьиэтин туттарбыппыт, ол билигин музей буолан турар. Билигин саҥа кулууп туттараары икки сылы быһа бырайыакка сүүрэн, илиибэр тутан дьолломмутум, тутууга бастакы позицияҕа турар. Сэттэ сыл устата уопуттаах режиссер Тырахинов Роман Егорович үлэлээн элбэх саҥа сүүрээннэри, испэктээктэри туруоран, үлэм саамай тахсыылаах сылларынан бэлиэтиибин. Коллективым бары эдэр дьон. Иванова Вера Владимировна бырайыак документациятыгар биир да сыыһата суох үлэлэһэн элбэҕи ситиспиппит. Бу үлэлэргэ дьаһалта өйөбүлэ (Олимпиада Афанасьевна Колодезникова, Юрий Юрьевич Комиссаров, Яков Иннокентьевич Степанов, Степан Александрович Кривошапкин, Мотрена Александровна Степанова, Василий Данилович Посельскай уо.д.а.) олус улахан суолталаах.
— Билигин култуура дьиэтэ хайдах үлэлиирий, инники былааннар хайдахтарый?
— Билигин аныгы сиэринэн грант суруйан, материальнай-техническай базаны бөҕөргөтөөһүнү тосхол оҥостобут. Кэнэҕэски кэнчээри ыччаты кэрэҕэ-сырдыкка угуйарга үлэлэһэбит. Фольклор сайдарыгар сахалыы тыыннаан араас тэрээһиннэри оҥоробут. Быйылгы сыл өрөспүүбүлүкэ үрдүнэн Култуура сылынан биллэриллэн үөрэ сылдьабыт.
— Коллегаларгытыгар, бу үлэҕэ сылдьар дьоҥҥо тугу баҕарыаххыный?
— Үлэбит түмүгэ киэҥ программалаах буоларыгар, култуураны өссө күүскэ сайыннарарга дьулуһуохха. Элбэх ситиһии арыалланыҥ, санаабыккыт барыта туоллун, элбэх көрөөччүлээх, маассабай тэрээһиннэри быыстала суох оҥоро туруохха!
Мария Захарова