Биьиги кинини истиҥ дьүөгэ, амарах ийэ, элэккэй, сырдык киһи быһыытынан билэрбит. Кини хаһан да аакка-суолга тардыспатаҕа, бэрт сэмэй, олус борустуой, киһи киһитинэн билэрбит.
Ону тэҥэ кини – ааспыт 90-с сыллар умнуллубат «сулустара» буоллаҕа. Намыын, намчы куолаһыгар таптал туһунан ырыаларыгар уйдаран төһөлөөх ол кэмнээҕи эдэр ыччат ыллаан-туойан, үҥкүүлээн, тапталга билинэн ааспыта буолуой?! Эдэр сааһыттан киниэхэ сүгүрүйэр дьоно тэҥҥэ улаатан, мэлдьи айар үлэтин сэҥээрэллэрин биллэрэллэрэ. Баара-суоҕа 46 сааһыгар сирдээҕи олоҕун түмүктээбититтэн курутуйабыт…
Ол эрэн ыра санаа оҥостубут, ылсыбыт дьыалабыт кини сырдык аатын үйэтитиэ диэн бигэ эрэллээхпит.
Искибиэр сирэ киин куорат Лермонтов уулуссатыгар бэрилиннэ. Билиҥҥи туругунан көрүүтэ-истиитэ суох сир. Ортотугар кулуумбалаах, аҕыйах эргэрбит ыскамыайкалаах. Аттынааҕы дьиэ олохтоохторо этэллэринэн, уота-күөһэ суох, хараҥа соҕус сир буолан, ускул-тэскил сылдьар дьон мустар түгэннэрэ да баар эбит. Биһиги туттараары гынар искибиэрбит бырайыагынан сырдатар банаардардаах, олорор, сынньанар сирдэрдээх, хачыаллардаах, сибэкки, от-мас олордуллар кулуумбалардаах буолар.
Бу күннэргэ Дьокуускай куоракка искибиэри туттараары, бүддьүөттэн үбүлээһиҥҥэ кыттар «Олохтоох көҕүлээһиннэри өйүүр бырагыраама» күрэҕэр кыттан эрэбит. Сайаапка биэрэргэ докумуон хомуйсуутугар сылдьабыт. Бассаап ситимигэр Ира доҕотторо, аймахтара, биир дойдулаахтара бииргэ искибиэр боппуруостарын быһаарсар, санаабытын үллэстэр, бэйэ-бэйэбитигэр күүс-көмө, сүбэ-ама буолар бөлөхтөөхпүт.
Ирабыт эдэркээн сылдьан, ыраах Томпо кыра дэриэбинэтиттэн кэлэн аата ааттанар, биллэр-көстөр, норуот тапталын ылар ырыаһыт буоларыгар ырыа алыптаах эйгэтин аспыт тапталлаах Дьокуускай куоратыгар искибиэр арыллара кэрэхсэбиллээх.
Дьүөгэбит аатынан искибиэргэ сибэкки кэрэтэ олордуллубутун, от-мас арааһа үүммүтүн, кыра-улахан дьон сынньана, күүлэйдии сылдьалларын харахпытыгар ойуулаан көрөбүт.
Ирина ырыатын сөбүлээн истээччилэр, сүгүрүйээччилэрэ, доҕотторо, биир дойдулаахтара, Саха сирин олохтоохтор көмө буолуохтара, өйүөхтэрэ диэн эрэллээхпит.
+7 914 273 17 21
Марианна Наумова-Уйгу Суhумнаах, Дьокуускай куорат, 2025 с.