Сэбиэскэй Сойуус ыһылла илигинэ үгүс көлүөнэ ыччат хомсомуол кэккэтигэр киирэн, онтон куорсун анньынан олох киэҥ аартыгар үктэнэрэ. Ийэ дойдуга туһалаах киһи буолар өйгө-санааҕа иитиллэрэ. Билигин даҕаны, аҕа көлүөнэ алтынньы 29 күнүн – Хомсомуол тэриллибит күнүн – умнубат уонна махталынан ахтар.
Аҕыйах хонуктааҕыта билигин 93-с сааһыгар сылдьар Евдокия Егоровна Егорова-1 көрсөн 50–60-с сыллардааҕы хомсомуоллар олохторун-дьаһахтарын туһунан кэпсииригэр көрдөстүм. Евдокия Егоровна 1954 с. Ытык Күөл орто оскуолатын бүтэрэн баран «Ударник» холкуоска үүт тутааччынан, онтон Кириэс Халдьаайы балыыһатыгар медицинскэй сиэстэрэнэн үлэлээбит. Олоххо көхтөөх, сытыы-хотуу кыыһы 1956 с. Маленков аатынан холкуос комсомольскай тэрилтэтин сэкиритээринэн талбыттар. Ити сыл Байаҕантай нэһилиэгэр бастакынан «Таас» бөһүөлэгэр электричество уота киирбитэ. Ол кэмнэр тустарынан Евдокия Егоровна маннык ахтар: «Дьон үлэҕэ наһаа көхтөөх этэ. Олох тупсан иһэрэ. Араадьыйа, уот киириитэ улахан сонун буолбута. Уус-уран самодеятельность, спорт араас көрүҥэ күүскэ сайдан барбыта. Оскуола учууталлара баһылыыр-көһүлүүр оруолу ылаллара. Оччотооҕу ыччаттар ааттарын сороҕун умнуталаан кэбистим. Хомсомуоллар олус көхтөөх буолаллара. Никифор Ябловскай, Семен Колесов, Анна Атакова (Варламова), Агафья Тарабукина, Эстафета Колодезникова курдук барыга бары кыттар ыччаттар бааллара. Хомсомуолга сылдьыбыт кэмнэрбин олус күндүтүк саныыбын. Холкуос комсомольскай тэрилтэтин сэкиритээрэ босхоломмут үлэһит буолбатах этэ, общественнай ноҕурууска буолара».
Евдокия Егоровна 1954 с. хомсомуол Устаабын уура сылдьыбытын Үөгэн оскуолатын түмэлигэр биэрбитэ.
Дьокуускайдааҕы культурнай-сырдатар училищены 1959 с. бүтэрбитэ. Ол кэнниттэн Кириэс Халдьаайыга, Томпоҕо, Ньурбаҕа, Ударникка, Арыы Толооҥҥо кулууптарга сэбиэдиссэйинэн, уус-уран салайааччынан, библиотекарынан биэнсийэҕэ тахсыар диэри кыһамньылаахтык үлэлээбитин дьон умнубат.
Алексей Павлов