Бүгүн Хомсомуол төрүттэммит күнэ. Арассыыйаҕа Ыччат Коммунистическай Сойууһа 1918 с. алтынньы 29 күнүгэр тэриллибитэ.
Бүгүн төһө да олохпут оҥкула уларыйдар, урукку көлүөнэ албан ааттаах олоҕун-үлэтин умнарбыт, ситэ сыаналаабат буоларбыт табыллыбат. Сэбиэскэй былаас кэмигэр үгүс ыччат үүнэр-сайдар кэскилин хомсомуол түстээбитэ.
Үөгэнтэн төрүттээх Фекла Васильевна Павлова 1936 с. Алдаҥҥа көмүс хостооһунугар үлэлии сылдьан ЫБСЛКС 10-с сийиэһигэр дэлэгээтинэн талыллыбыта. Тулаайах кыыс үлэттэн дьолун булан, аан бастаан Москубаны көрөн баран үөрүүтүттэн долгуйан ытаабытын туһунан ахтыыта Саха араадьыйатын фондатыгар уурулла сытар.
Биһиги оскуолабытын наар «үчүгэй» сыаналарынан бүтэрбит Никифор Романович Ябловскай икки оройуоҥҥа комсомол райкомун бастакы сэкирэтээринэн талыллан үлэлээбитэ, кэлин өрөспүүбүлүкэҕэ биллэр салайааччы буолбута, икки төгүл Өрөспүүбүлүкэ Үрдүкү Сэбиэтигэр, Ил Түмэҥҥэ дьокутаатынан талылла сылдьыбыта.
Норуот хаһаайыстыбатын араас салааларыгар ситиһиилээхтик үлэлээбит биир дойдулаахтарбыт ааттарынан киэн туттабыт. Бу күннэргэ оскуолабыт түмэлигэр бэлиэ күҥҥэ аналлаах быыстапка тэрилиннэ.
Дойду, өрөспүүбүлүкэ, нэһилиэк хомсомуолун историятын билиигэ аналлаах викторина ыытылынна.
Кыайыылаахтарынан Семён Матаркин, Николай Келин, Надежда Харитонова ааттаннылар.
Аҕа көлүөнэ умнубат, ыччаты сырдык сулус буолан үтүөҕэ, үрдүккэ сирдээбит Хомсомуол күнүнэн, күндү доҕоттор!
Алексей Павлов