Олох ыараан дуу, дьон-сэргэ өйө-санаата уларыйан дуу, билигин урукку курдук үөрэ-көтө үлэлии сылдьар дьону көрсөр аҕыйах. Кириэс Халдьаайыга сибээс тэрилтэтэ – дьоҕус тэрилтэ. Бу үс киһилээх коллектив нэһилиэк бары тэрээһинигэр кыахтара баарынан кытталлар. Салайааччынан Полина Жиркова үлэлээбитэ номнуо 15 сыл буолла.
Бу кэм устата тэрилтэ үлэтигэр үгүс уларыйыылар киирдилэр. Дьон-сэргэ сибээс тэрилтэтин өҥөтүнэн күннэтэ туһана олорор. Кэлбит хаһыаты, баһыылканы, суруктары кэмигэр тиэрдии, биэнсийэ түҥэтиитэ, араас өҥө иһин төлөбүрдэри ылыы – барыта бу тэрилтэ нөҥүө оҥоһуллар. Ол иһин манна элбэх киһи сылдьар. Үлэһиттэр Марфа Охлопкова, Дария Сыромятникова, салайааччылара – Полина Жиркова дьоҥҥо-сэргэҕэ куруук болҕомтолоохтук сыһыаннаһаллар, үөрэ-көтө көрсөллөр. Билиҥҥи сыыппара үйэтигэр саастаах дьон билбэтэ-сатаабата үгүс. Ол иһин сүбэ-ама ылааччы да элбэх. Аны, ырыынак күһэйэн, кинилэр нөҥүө бородуукта атыыланар буолла. Нэһилиэнньэ ордук чэпчэки сыанаҕа бурдугу, саахары бу тэрилтэ нөҥүө сакаастаан ылар. Куруук холку, эйэҕэс үлэһиттэрдээх биллибэт-көстүбэт үлэлээх тэрилтэ, дьиҥэр, күннээҕи олохпут үгүс сүрүн кыһалҕаларын быһаара олорор. Полина Гаврильевнаны нэһилиэк олохтоохторо быйыл, элбэх куолаһы биэрэн, олохтоох Сэбиэт дьокутаатынан талбыттара.
Аҕыйах хонуктааҕыта «Саха Өрөспүүбүлүкэтин сибээһин бочуоттаах үлэһитэ» бэлиэни тутта. Куруук бу курдук дьон-сэргэ махталын ыла туруҥ!
Алексей Павлов