Кулун тутар 30 күнүгэр саха норуодунай суруйааччыта Е.П. Неймохов 75 саастаах үбүлүөйүнэн дойдутун дьоно бэртээхэй испэктээк туруоран бар дьон дьүүлүгэр таһааран улахан биһирэбили ылыахтарын ыллылар. Бэйэбит уолбут, талааннаах режиссер Р.Е. Тырахинов автор үс айымньытынан дьүһүйүү испэктээк оҥорбут. Испэктээк олус дириҥ ис хоһоонноох буолан киһи дууһатын кылын таарыйар, долгутар, уйадытар. Роман Егорович, өрүү буоларын курдук, араас режиссерскай ньымалары туһанан айымньыны арыйар, көстүүлэри сытыырхатар…
Егор Петрович айымньыларын тоҕо эрэ режиссердар сөбүлээн туруораллар. Ол курдук кини айымньыларынан испэктээктэр Саха государственнай драматическай театрыгар, Үүнэр көлүөнэ театрыгар уонна нэһилиэк кулууптарын сценатыгар туруоруллан дьон-сэргэ сэҥээритин ылаллар.
Аан бастакынан 1983 сыллаахха В. Фомин режиссердаах «Хапсыһыы» испэктээх турбута. Хас да төгүллээн көрдөрбүттэрэ да заал өрүү толору буолара.
Тоҕо, тугунан бу айымньы дьону интэриэһиргэппитин үгүстүк суруйбуттара. Олортон мин аҕыйах санаалары холобурдаатахпына бу боппуруоска эппиэт кэлэр курдук.
«Көрөөччүлэри «Хапсыһыы» инсценировката тугунан кэрэхсэттэ? Үгүстэр сэһэҥҥэ кэрэхсээбит билиҥҥи кэм тыын боппуруоһун — ыччат олоххо суолун-ииһин өйдөөһүнүн уустугун сыанаҕа көрө кэлэллэр эбит.» Г.Г. Филиппов тыл билимин доктора, профессор.
«Спектакль интересен прежде всего тем, что делается попытка соприкоснуться с современным материалом, эмоционально подключить зрителя к коллизиям, из которых может извлечено нечто важное, существенное для нравственного формирования личности человека наших дней.» С. Желобцова, преподаватель СВФУ им. М. К. Аммосова.
«Давно не приходилось у входа в Якутский драматический театр слышать:»Нет ли лишнего билетика?»… Режиссер откровенно ставит в своей работе наболевшие вопросы воспитания молодежи.» С. Захарова, педагог.
Дьэ, итинник бары өттүнэн ырыппыттара бу солун тиэмэни таарыйбыт Егор Петрович айымньытын.
Өссө бу театрга 2010 сыллаахха З. Багынанова уонна М. Николаева «Сайсары күөлгэ түбэлтэ» диэн Е. Неймохов айымньытынан инсценировка оҥорон дьон дьүүлүгэр таһаарбыттара.
Бу испэктээк аныгы үйэ хардыытынан саҥа ньымалары туттубуттарынан уратылаах этэ. Ол курдук киинэ матырыйааллара, сэдэх хаартыскалар, архыып докумуоннара проектор нөҥүө экраҥҥа көрдөрөн испэктээк ис хоһоонун байыппыттара.
Улуу Кыайыы 70 сылын көрсө Үүнэр көлүөнэ театырын артыыстара Е. Неймохов «Улуу буойун» диэн Советскай Союз геройа Ф.М. Охлопков туһунан айымньытынан испэктээк туруорбуттара Туруорааччы — режиссер А. Титигиров буолбута.
Испэктээк бастакы көрөөччүлэринэн сэрии уонна тыыл бээтэрээннэрэ буолбуттара. Кинилэр дохсун ытыс таһыныылара үрдүк сыанабыл буолбута.
Биир дойдулаахтарын айымньытын лойдутун дьоно эмиэ хаһан да тумнубаттар. Ол курдук
2015 сыллаахха библиотекарь Никифорова Г.В. «Ильмень үрдүнэн туруйалар» диэн айымньытынан Кыайыы 70 сылыгар инсценировка оҥорон дьон дүүлүгэр таһаарбыта. Дьүһүйүү бэрткэ табыллан дьон биһирэбилин ылыан ылбыта.
2016 сыллаахха эдэр режиссер А. Захаров Е. П. Неймохов олоҕун уонна айар үлэтин көрдөрөр дьүһүйүү оҥорбута.
2017 сыллаахха режиссер А. Захаров «Хапсыһыы» сэһэнинэн испэктээк туруорар. Көрөөччүлэринэн тыл билимин доктора, профессор В.Б. Окорокова, поэтесса Г.А. Фролова уонна суруйааччы кэргэнэ М.П. Неймохова испэктээги үрдүктүк сыаналаабыттара, эдэр киһиэхэ алгыс тыл эппиттэрэ.
2021 сыллаахха эмиэ бэйэбит уолбут Р.Е. Тырахинов «Аҕалаах оҕо кэпсэтиилэрэ»диэн испэктээк туруоран дьон сэҥээриитин ылыан ылбыта.
Манна даҕатан эттэххэ олохтоох артыыстарбыт оруолларыгар бүтүннүү киирэн, ис дууһаларыттан оонньуулларын киһи эрэ сөҕө, астына, махтана көрөр.
Ити курдук, Егор Неймохов айымньыларын сөбүлүүр, махталлаах дьоно-сэргэтэ кэнэҕэскитин да испэктээк оҥорон, сценаҕа туруоран дьон-сэргэ дууһатын таарыйыахтара, долгутуохтара диэн эрэниэҕи баҕарыллар.
А. Ефремова, Мэҥэ Алдан түмэлин үлэһитэ