Олунньу 19 күнүгэр киэн туттар биир дойдулаах суруйааччыбыт, бэйиэппит Федор Григорьевич Винокуров — Даадар 115 сааһын бэлиэтии Байаҕантай нэhилиэгэр «Даадар ааҕыылара» күрэс буолан ааста. Сыллата маннык ааҕыылар оҕолор икки ардыларыгар ыытыллара. Быйыл бэйиэт үбүлүөйүн бэлиэтии уонна нэһилиэк иһинэн ыытыллар спартакиада чэрчитинэн оскуола үөрэнээччилэригэр уонна тэрилтэлэр үлэһиттэригэр ыытыллынна.
Күрэс саҕаланыытыгар сүрүннүүр библиотекарь Никитина И.И. бэйиэт кылгас эрээри бэрт чаҕылхай олоҕун күөх экраҥҥа көрдөрөн туран көрөөччүлэргэ билиһиннэрдэ. Күрэспитин дьүүллээтилэр сытыы бөрүөлээх, айар-суруйар таланнаах «Даадар түмсүү» тумус туттар дьоно С. И. Константинов-Таас Уола, Гоголев А. А.-Гринпис уонна Тегюрюков А. Ф.-Өлөксөөн. Күрэскэ барыта 13 үөрэнээччи уонна 4 тэрилтэ холбоһуктаах хамаандалара кыттыыны ыллыллар. Алын сүһүөх оскуола үөрэнээччилэриттэн 1 миэстэни ылла Макимова Кэрэчээнэ (сал. Сивцева М. В.), 2 миэстэни Калинина Настя (сал. Попова Т. Ю.), 3 миэстэни Атакова Сардана (сал. Атакова И. Е.). Ортоку кылаастарга 1 миэстэ – Мегинов Даниил, 2 миэстэ – Колодезникова Сандаара, 3 миэстэ – Неустроев Сарыал (сал. Ноговицына С. Г.). Үрдүк кылаастартан кыайыылааҕынан таҕыста Заболоцкай Дима (сал. Находкина П. А.).
Биэчэри бэйэлэрин көхтөөх кыттыыларынан киэргэттилэр барытыгар кыһамньылаах, куруутун инники күөҥҥэ сылдьар аҕам саастаах көлүөнэ дьоно – «Айгы» кулууп. Тэрилтэлэр бөлөҕүнэн ааҕыыларыгар КириэстХалдьаайы орто оскуолатын уһуйааччылара уонна учууталлара «Саас» диэн бэрт сэргэх монтаж көрдөрөн көрөөччүлэри сэргэхситтилэр. Культура кэрэ эйгэтин уонна олохтоох дьаһалта үлэһиттэрэ «Даадар бэйиэт олоҕун олуктара» суруйааччы олоҕун хоһоонноруттан ылан, 30 сыллардааҕы таҥастары таҥнан монтаж көрдөрөн көрөөччүлэри уйадыттылар. Үөгэн нэһилиэгин үлэһит дьоно «Олорбут олоҕум ойуута сурукка тиһиллэн иһиэҕэ» бэйиэт хоьоонноруттан быһа тардан бэрт истиҥ, сэргэх монтаж көрдөрдүлэр. Элбэх ахсааннаах тахчыбыттара, доргуччуу ааҕыылара астыннарда. Уһуйааннарбыт иитээччилэрэ бэйиэт хоһооннорун дорҕоонноохтук аахтылар.
Үһүс миэстэ – оскуола коллектива, иккис – культура уонна олохтоох дьаьалта кыттааччылара. Кыайыыны ситистэ Үөгэн үлэһит дьоно.
Бу киэһэ бэйиэппит хоһоонноро өйтөн ааҕылланнар нэһилиэк дьонун сэргэхситтилэр,үүнэн иһэр көлүөҕэ бэйиэт олоҕун, хоһоонноорун суолтатын иҥэрдилэр. Күрэһи тэрийэргэ күүс көмө буолбут тыа сирэ «Байаҕантай нэһилиэгин» баһылыгар Л. Д. Голиковаҕа уонна «Даадар» литературнай түмсүү чилиэттэригэр махталбытын тиэрдэбит.
Инна Никитина, Байаҕантай олохтоох модельнай библиотекатын сүрүннүүр бибилэтиэкэрэ