№6, сэтинньи, 1978 с.
(ЫБСЛКС райкомун таһаарыыта)
ЫБСЛКС 60 сылын туолаары турдаҕына тыһыынчанан уолаттар уонна кыргыттар, ударнай вахтаҕа турунан, ыччат үлэтин летопиһыгар саҥа албан ааттаах страницалары суруйдулар.
Комсомол 60 сылыгар аналлаах үөрүүлээх мунньахха оройуон эдэр үлэһиттэрин – шахтердар, тутааччылар, сүөсүһүттэр, табаһыттар, хааччыйыы эйгэтин үлэһиттэрин киэн туттан ааттаатылар. Бастыҥтан-бастыҥнар ЫБСЛКС КК знакарынан, комсомол обкомун грамоталарынан наҕараадаланнылар. «Көмүс куолас» знак Герой Ф. Охлопков аатынан совхоз милиоратор-тракториһыгар Павел Бурцевка туттарылынна. Техникаҕа тапталлаах сыһыан, үтүө суобастаах буолуу уонна үлэни таптааһын Павел ураты чертатынан буолар, кини аата совхоз бастыҥ үлэһиттэрин ортолоругар хаста да ааттаммыта.
«Хаандыга» совхоз Бордойдооҕу ферматын ыанньыксыта Лариса Кульпина бэйэтин ситиһиилээх үлэтин ЫБСЛКС 60 сылыгар анаата. Алтынньы 7 к., ССРС саҥа Конституциятын маҥнайгы сылын күнүгэр, кини пятилетка үһүс сылын былааннаах сорудаҕын толордо, билигин төрдүс сыл суотугар үлэлиир. Үрдүк производственнай көрдөрүүлэрин иһин Лариса Кульпина «Эдэр сүөсүһүт» диэн ЫБСЛКС КК знагынан наҕараадаланна. Герой Ф. Охлопков аатынан совхоз эдэр үлэһиттэргэ Василий Луковцевка, Дьабарыкы Хайатааҕы автобаза токара Василий Загубиновка, «Нежданинская» шахта электрослесара Александр Васяниҥҥа, Хаандыгатааҕы пиибэ заводун утаҕы кутууга линиятын биригэдьиирэ Людмила Блиноваҕа ЫБСЛКС КК “Сатабыллаах маастар” знага туттарылыннылар.
Л. Винокурова
Снимокка: ЫБСЛКС КК «Көмүс куолас» знагын ковалера Павел Бурцев; «Березка» маҕаһыын атыылааччыта Надежда Глухова; ЫБСЛКС КК «Сатабыллаах маастар» знагын кавалера Владимир Баишев.
Комсомолга – биһиги үлэнэн бэлэхпит
(ЫБСЛКС 60 сылыгар комсомольскай тэрилтэлэр араапардарыттан)
Дьабарыкы Хайа
Советскай норуот албан ааттаах юбилейын, советскай дьоннор бары көлүөнэлэрин бырааһынньыгын – Ленинскэй комсомол 60 сылын достойнайдык көрсөргө Дьабарыкы Хайа бөһүөлэгин комсомолецтара уонна ыччата үлэ сорудахтарын толорууга, политическай уонна уопсай үөрэхтээһиҥҥэ үрдүк түмүктэри көрдөрдүлэр.
«Дьабарыкы Хайа» шахта коллектива чоҕу хостооһун государственнай былаанын 115,7 бырыһыан толордо, былааны таһынан 54205 тонна хара көмүс хостонно, предприятие бары учаастактарыгар комсомолецар үлэлииллэр.
Социалистическай куоталаһыы инники күөнүгэр ЫБСЛКС XVIII съеһин аатынан Николай Тагай салайар ыччат комсомольскай биригээдэтэ баар, тутар монтажтыыр үлэлэри баһылыыр «Миллионер» биригээдэлэр ахсааннарыгар киирэр иһин ситиһиилээхтик охсуһар.
Юбилейнай сылга эдэр коммунист Виктор Торопыно салайар экскаваторщиктар ыччат-комсомольскай экипажтара туйгуннук үлэлиир. Чоҕу тиэйии былаана 113,4 бырыһыан туолла.
ЫБСЛКС бары чилиэннэрэ уопсай уонна политическай үөрэхтээһининэн хабылыннылар.
«Пищепром» холбоһук
Быйыл комсомол юбилея Улуу Октябрь 61 сылын иннинэ буолла. Үтүө үгэһинэн дойду үлэһиттэрэ бу событиелары үлэҕэ улахан бэлэхтэрдээх көрсөллөр. «Пищепром» холбоһук коллектива бу даталарга үлэҕэ үчүгэй ситиһиилэрдээх тиийэн кэллэ. 1978 сыл тоҕус ыйыгар былааны таһынан 11,4 тыһыынча деликатр пиибэ оҥоһуллунна.
«Пищепром» маҥнайгы сүһүөх комсомольскай тэрилтэтэ «Бүгүн бэҕэһээҥҥитээҕэр үчүгэйдик, оттон сарсын бүгүҥҥүтээҕэр үчүгэйдик» девиһинэн үлэлиир. Биһиги предприятиебытын көрдөххө бу девиз толоруллар. «Пищепром» маҥнайгы сүһүөх комсомольскай тэрилтэтэ кварталынан быһыллар оҥоһуллубут былааҥҥа сөп түбэһиннэриллэн барар. Билиҥҥи кэмҥэ маҥнайгы сүһүөх комсомольскай тэрилтэ 7 киһилээх. Быйыл ЫБСЛКС кэккэтигэр 2 киһи ылылынна. Төһө даҕаны аҕыйах ахсааннааҕын иһин, маҥнайгы сүһүөх комсомольскай тэрилтэ коллектив олоҕор активнайдык кыттар, күннээҕи үлэҕэ саамай активнай кыттыыны ылар. Комсомолецтар «Экономическай билиилэр төрүттэрэ» куруһуок истээччилэринэн буолаллар. 1978 сыл кулун тутарга Ленинскэй зачет ыытыллыбыта, онно бары комсомолецтар аттестацияламмыттара. Холбоһук комсомолецтара уонна ыччата коммунистическай субуотунньугу ыытыыга саамай активнай кыттыыны ылбыттара. Онус пятилетка фондугар 100 солк. бэрилиннэ. Ыччат-комсомольскай субуотунньуктара ыытыллыбыттара.
«Пищепром» комсомолецтарын ортолоругар социалистическай куоталаһыы бастыҥнара, кыайыылаахтара бааллар. Кинилэр ортолоругар кутуу линиятын биригэдьиирэ Л. Блинова. Кини биригээдэтэ үрдэтиллибит социалистическай эбэһээтистибэни ылыммыта. Онус пятилетка үс сыллаах былааны сэтинньи 7 күнүгэр толоруоҕа.
Комсомол 60 сылын иннинэ «Пищепром» маҥнайгы сүһүөх комсомольскай тэрилтэтэ ЫБСЛКС райкомугар тэрилтэ үлэҕэ ханнык ситиһиилэрдээх кэлбитин араапардыыр. Тэрилтэ комсомолецтара ЫБСЛКС райкомун партия XXV cъеһэ уонна ЫБСЛКС XVIII съеһэ бэлиэтээбит былаанарын олоххо киллэрэргэ күүтүспүт харыстыахпыт суоҕа диэн эрэннэрэллэр.
Хаандыга орто оскуолата
Маҥнайгы сүһүөх комсомольскай тэрилтэ 134 комсомолецтаах, 10 группалаах. Ааспыт үөрэх сылыгар ЫБСЛКС кэккэтигэр 141 киһи ылыллыбыта. Хаандыга орто оскуолатын комсомольскай тэрилтэтэ тиһэх икки сылга – бастыҥ.
Биһиги оскуолабыт үөрэнээччилэрэ сайыҥҥы сынньалаҥ кэмигэр бөһүөлэк предприятиеларыгар МТХУ базатыгар, орска уонна атын тэрилтэлэргэ үлэлээбиттэрэ. Сорох үөрэнээччилэр үлэ лааҕырыгар сылдьыбыттара, сорохтор совхозка үлэлээбиттэрэ. Сайын барыта 104 үөрэнээччи үлэлээтэ.
Балаҕан ыйын 13-14 күннэригэр биһиги оскуолабыт үөрэнээччилэрэ бөһүөлэги көҕөрдүүгэ үлэлээбиттэрэ. Онус кылаастар Петр Алексеев уулуссатын көҕөрдүүгэ үлэлээбиттэрэ. Оҕолор үчүгэйдик үлэлээтилэр уона 600 маһы олортулар.
Маны таһынан оскуола үөрэнээччилэрэ «Хаандыга» совхозка үлэлээбиттэрэ. Кинилэр оҕуруот аһын үүнүүтүн хомуйууга уонна суортааһыҥҥа көмөлөстүлэр.
Хас иккис комсомолец «4» уонна «5» сыанаҕа үөрэнэр. Кылааска консультпууннар тэрилиннилэр. Оҕолор тематическай куруһуоктарга сылдьаллар. Математикаҕа, физикаҕа химияҕа факультативтар тэрилиннилэр.
«КЫҺЫЛ ЗНАМЯ», 3 стр. 3.11.1978 с., №129
Сурукка тистэ: Ольга Халыева