Кэнники сылларга оройуоҥҥа да, нэһилиэккэ ынах сүөһү ахсаана аччыы турар. Арай сылгы ахсаана улаханнык халбаҥнаабат, кыралаан эбиллэр.
Байаҕантай нэһилиэгэр ааспыт күһүн 57 убаһа иитиигэ хаалбыта. Сылгыны иитии киһи аайы кыайтарбат, убаһаны кыстатыы түбүктээх дьарык. Аны дьылтан эмиэ улахан тутулуктаах. Былырыын төрүөх үчүгэй буолан уонна дьон оту хото бэлэмнээн быйылгы кыстыкка арыый элбэх убаһа иитиллэн турар. Сылгы иитиитинэн утумнаахтык дьарыктанар хаһаайыстыбалар Анатолий Мандаров — 15, Александр Васильев, Юрий Варламов — 4-түү төбөнү аһатан тураллар.
Үчүгэйэ диэн сылгы иитиитигэр биирдиилээн эдэр дьон эмиэ ылсан эрэр. Дьыл оройо буолла. Быйыл хаһыы баар буолан толооҥҥо да сылдьар сылгылар туруктара куһаҕана суох. Хаһаайыстыбаларга от саппааһа баар. Бу күннэргэ олохтоох дьаһалта эбиэс тиэйтэриитин саҕалаата.
Алексей Павлов