Арассыыйаҕа Аҕа дойдуну, Саха сиригэр Ийэ дойдуну көмүскээччилэр, Томпо улууһугар Өйдөбүнньүк уонна сомоҕолоһуу сылларынан биллэриллибитэ.
Олунньу 3 күнүгэр Ыҥаа нэһилиэгин олохтооҕо, тыыл, үлэ бэтэрээнэ Прокопьев Данил Михайлович 90 сааһын туолла. Бу үөрүүлээх күҥҥэ ытык кырдьаҕаһы нэһилиэк олохтоохторун аатыттан Ыҥаа нэһилиэгин баһылыга Ринат Шарипов, Томпо оройуонун Социальнай харалта комплекснай киинин салайааччыта Галина Канашова, бэтэрээннэр оройуоннааҕы сэбиэттэрин бэрэссэдээтэлэ Галина Готовцева Данил Михайловиһы дьиэтигэр тиийэн дьоһун түгэнинэн эҕэрдэлээтилэр.
Кинилэр дойду Бэрэсидьиэнэ Владимир Путин, Ил Дархан Айсен Николаев уонна олохтоох нэһилиэк дьаһалтатын баһылыга Р.А. Шарипов ааттарыттан эҕэрдэ суруктарын кытта үбүлүөйдээх бэлэхтэрин туттардылар.
Ыалдьыттары Данил Михайлович, кэргэнэ Мария Афанасьевна уонна кыргыттара үөрэ-көтө көрүстүлэр, мааны остуол тэрийэн ирэ-хоро кэпсэттилэр.
«Эн бэйэҥ күүскүн, өйгүн-санааҕын ууран, дьонум-сэргэм туһа диэн колхуос, сопхуос күүрээннээх кэмнэригэр үтүө суобастаахтык үлэлээбит үтүөҥ иһин барҕа махталбытын тиэрдэбит!
Баҕарабыт эйиэхэ, ытык мааны кырдьаҕаспытыгар, чэгиэн доруобуйаны, үгүс үөрүүлээх, дьоллоох-соргулаах уһун үйэни, нус-хас байылыат олоҕу, этэҥҥэ буолууну!», — диэн эҕэрдэлээтилэр.
Билигин Данил Михайлович уон сиэн уонна түөрт хос сиэн тапталлаах эһэтэ буолар.
Ытыктыыр киһибитигэр кытаанах доруобуйаны, өссө да уһуннук олороругар баҕарабыт!
Мария Захарова