Быйыл уруккута Байаҕантай улууһугар Үөгэн нэһилиэгэ тэриллибитэ 100 сылын туолар. Олунньу 23 күнүгэр, Үөгэҥҥэ, ити бэлиэ датаҕа аналлаах Аҕа дойду Улуу сэриитин кыттыылааҕа, оскуолабыт бастакы үөрэнээччилэриттэн биирдэстэрэ Афанасий Яковлевич Мекюрдянов бирииһигэр кыра калибрдаах саанан ытыыга нэһилиэкпитигэр бу сылга бастакы улахан күрэхтэһии ыытылынна.
Күрэхтэһиини кылгас киирии тылынан оройуон Сэбиэтин депутата А. А. Павлов аста. Ол кэннэ Байаҕантай нэһилиэгин дьаһалтатын баһылыга Л. Д. Голикова уонна Үөгэн кырдьа5ас олохтоо5о С. Е. Матаркин ытыс тыаһынан доҕуһуоллатан, күрэхтэһии былаа5ын өрө көтөҕөллөр.
Саһылтан, Мэҥэ Алдантан, Кириэс Халдьаайыттан, Арыы Толоонтон барыта 33 кыттааччы кэлэн илин-кэлин түһүстүлэр.
Дьахталларга кыайыылаах үрдүк аатын Саһылтан сылдьар дэгиттэр спортсменка Мария Попова ылла. Иккис миэстэҕэ Арыы Толооннор эрэллэрэ Ньургуйана Слепцова тигистэ. Үһүс миэстэҕэ Ударниктан ветеран ытааччы Изольда Степанова таҕыста.
Эр дьоннорго кыайыы өрөгөйүн Михаил Стручков (Кириэс Халдьаайы) биллэ. Иосиф Слепцов (Ударник), Гаврил Долгунов (Мэҥэ Алдан) иккис, үһүс миэстэлэри ыллылар.
Ветераннар ортолоруттан Николай Келин (Ударник), Пётр Тополин (Кириэс Халдьаайы), Аркадий Степанов (Ударник) бириистээх миэстэлэри үллэһиннилэр.
Абсолютнайга бастыыр иһин күрэхтэһиигэ 28 спортсмен суруйтарда. Муҥутуур кыайыылаах аатын уонна сүрүн бирииһи — телевизоры — Мэҥэ Алдантан сылдьар Гаврил Долгунов ылла. Иккис миэстэҕэ Ньургуйана Слепцова үгүс эр киһини кэннигэр хаалларан эрэллээхтик таҕыста. Үһүс миэстэ5э спорт ветерана Павел Сыромятников, төрдүс бириистээх миэстэҕэ Аркадий Степанов тигистилэр.
Күрэхтэһиини Саха Республикатын үтүөлээх тренерэ С. П. Попов салайааччылаах судейскай коллегия үчүгэй тэрээһиннээхтик ыытта. Кыайыылаахтарга дьаһалтата баһылыга Л. Д. Голикова грамоталары, сыаналаах бириистэри туттартаата.
А. Павлов