Балаҕан ыйын 14 күнэ. Кириэс-Халдьаайы бөһүөлэгэр маассабай спорт сайдыытыгар олоҕун барытын анаабыт, үгүс көлүөнэ ыччата ахтар-саныыр учууталлара Семен Егорович Колесов төрөөбүт күнүгэр анаан сүрдээх көхтөөх, сэргэх, өрө күүрүүлээх күрэхтэһии Кириэс-Халдьаайытааҕы сынньалаҥ пааркатыгар буолан ааста. Күрэхтэһиини олохтоох дьаһалта, спорду өрө тутааччылар, нэһилиэк эдэр ыччата иилээн-саҕалаан ыыттылар.
Күрэх тэрилтэлэринэн ыытылынна. Барыта алта хамаанда кытынна. Киһи сэргии көрөрө кыттааччылар көхтөөх итиэннэ өрө көтөҕүллүүлээх сыһыаннара. Көрөөччүлэр даҕаны ис сүрэхтэриттэн ыалдьан, өйөөн биһиги дьиэ кэргэни олус сөхтөрдүлэр.
Паарканы 2020 сыллаахха оройуон баһылыга Яков Иннокентьевич Степанов сүүрэн-көтөн, үбүлээн, бэйэбит уолаттарбыт Василий Габышев, Дмитрий Максимов оҥорон бэрт тупсаҕай көстүүлээх ааркалаан, хас да көлүөнэ ыччат хадаатайыстыбаларынан Семен Егорович Колесов аата иҥэриллибитэ. Үөрүүлээх аһыллыыта аҕабыт 90 сааһа буолар күнүгэр ыытыллыбыта.
Күрэх түмүгүнэн 1 миэстэни Арыы-Толоон хамаандата, 2 миэстэни Кириэс-Халдьаайытааҕы орто оскуола, Спорт оскуолата (ДЮСШ), Эколого-биологическай киин холбоһуктаах хамаандата, 3 миэстэни Ударник хамаандата ылбыттара.
Колесовтар дьиэ кэргэн анал бириистэрин икки киһи тутан үөрүүтэ үксээтэ. Эдэрдэргэ «Дьулурҕан сүүрүүк» анал ааты Слепцов Кирилл, бэтэрээннэргэ көхтөөх кыттыытын иһин Саввина Валентина ылбыттара.
Бу күрэҕи тэрийэн ыыппыт бары биир дойдулаахтарбытыгар чуолаан Кириэс-Халдьаайы баһылыгар Лена Дмитриевнаҕа, олохтоох дьаһалтаҕа спорт бэтэрээннэригэр, аҕабыт үөрэнээччитигэр Василий Петрович Карбакановка дириҥ махталбытын биллэрэбит.
Аҕабытын Семен Егорович Колесовы куруук ахтар-саныыр дьон баарыттан биһиги олус диэн үөрэбит уонна астынабыт! Кыайыылаахтарга өссө төгүл эҕэрдэ эрчимэ, кыттааччыларга күүстээх эрчиллиини! Эһиил күһүн өссө өрө күүрүүлээх тэрээһин ааһыа диэн эрэнэбит!
Семен Егорович кыыһа Алла Семеновна Колесова