Айхал-алгыс
Сахам тыла,
Уруй олук
Сахам тыла,
Күн бэлэҕэ
Сахам тыла,
Эйиигин мин ыҥырыаҕым,
«Ийээ!» диэммин хаһытыаҕым.
Саха Сирин бастакы Президена М.Е. Николаев 1996 сыл олунньу 9 күннээҕи 1294 №-дээх «Төрөөбүт тыл уонна сурук-бичик күнүн биллэрии туһунан» Ыйааҕыгар олоҕуран, С.А. Новгородов төрөөбүт күнэ — олунньу 13 күнэ — Төрөөбүт тыл уонна сурук-бичик күнүнэн биллэриллибитэ.
Бүгүн биһиги библиотекабытыгар бу суолталаах күҥҥэ аналлаах «Саха тыла – өркөн өйбүт» диэн ааттаах 5 түһүмэхтээх тыл оонньуута ыытылынна. Оонньууга 2-лии киһилээх, сахалыы таҥастаах 3 хамаанда кыттыыны ылла. Кыттааччылар саха баай тылын иҥэринэр 5 түһүмэҕи аастылар. Ол курдук, бастакы түһүмэх » Өс хоһооно – өбүгэ номоҕо». Манна кыттааччылар өс хоһоонун ситэрэн биэрдилэр. Иккис түһүмэх – «Тылбаас». Бу түһүмэххэ нууччалыы тыллары уу сахалыы тылбаастаан күрэхтэстилэр. Үһүс түһүмэх – «Тылы таай», бу күрэххэ бэриллибит тыллары таайтарыы. Хайа хамаанда биир мүнүүтэ иһигэр элбэх тылы таайтарар, ол кыайыылаах. Төрдүс түһүмэх – «Майгыннаһар тыллар». Манна бэриллибит тылга хайа хамаанда элбэх синонимы булар эбит диэн. Бэһис түһүмэх – «Байанай алгыһыттан саҕаламмыт литература». Бу түһүмэххэ хартыыналары сирдэтэн айымньы аатын таайыы.
Кыттааччылар олус көхтөөхтүк кыттан, билбэтэхтэрин билэн, оонньоон, сахалыы астаах сандалы тула олорон саха мааны астарын: алаадьыны, саламааты, быырпаҕы амсайан дуоһуйан тарҕастылар.
Татьяна Гоголева