Алтынньы 27 күнүгэр Байаҕантай нэһилиэгин 60–90 сыллардаах комсомолецтара «Эн, комсомол – мин дьолум! » диэн тэрээһиҥҥэ «Байаҕантай» норуот айымньытын киинигэр итии чэйдээх остуол тула түмсэн ирэ-хоро кэпсэтэн, урукку комсомольскай кэмнэрин санаан, ыллаан -туойан, оонньоон-көрүлээн аастылар.
Бу үөрүүлээх күн кинилэр икки хамаанданан арахсан «Комсомол – эдэр саас сирдьитэ! » диэн интеллектуальнай оонньууга күрэхтэстилэр. Эдэр саас эрчимнээх ырыаларынан эҕэрдэлээтилэр эдэр көлүөнэ ырыаһыттара Лида Дьячковская, Роман Ефимов, Ариан Атастыров. Манна мустубут комсомолецтарга итии төлөннөөх эҕэрдэтин тиэртэ Герой Ф.М. Охлопков аатынан совхоз комсомольскай тэрилтэтин 80-с сылларга босхоломмут секретарынан үлэлээбит Борисова Валентина Афанасьевна. Бу күн элбэх комсомольскай ырыалары ыллаатылар, ону тэҥэ эдэр эрдэҕинээҕи моднай таҥастарын кэтэннэр сыанаҕа көрдөрдүлэр. Комсомол эдэр ыччаты түмсүүлээх, бэйэни сөптөөхтүк салайынарга үөрэппитэ. Кырдьык да оччотооҕу комсомолецтар ырыанан үөрэххэ, үлэҕэ инники күөҥҥэ билигин да сырыттахтара. Өссө төгүл эдэрдии эрчимнээх биһиги комсомолецтарбытыгар ситиһиилээх үлэни, кытаанах ыстаал курдук доруобуйаны, уҕараабат эрчими баҕарабыт!
Альбина БАЛАНОВА
