Ытыктабыллаах быыбардааччылар!
Томпо оройуонун территориальнай быыбардыыр хамыыһыйата от ыйын 31 күнүн 18:00 чаастааҕы туругунан балаҕан ыйын 8, 9, 10 күнүгэр буолар быыбарга бэлэмнэнии хаамыытын сырдатар.
Саха Өрөспүүбүлүкэтин сэттис ыҥырыылаах норуот депутаттарын талар быыбарга 32 №-дээх Таатта-Томпо биир мандааттаах быыбардыыр уокуругар үс кандидат регистрацияланна: Бочоруков Константин Константинович («СПРАВЕДЛИВАЯ РОССИЯ – ПАТРИОТЫ – ЗА ПРАВДУ» социалистическай политическай партияттан) , Ермолаева Екатерина Ивановна («Новые люди» политическай партияттан), Лебедев Виктор Николаевич («Единая Россия» Бүтүн Россиятааҕы политическай партияттан).
«Хаандыга бөһүөлэгэ» КТ бөһүөлэктээҕи Сэбиэт депутаттарын хаттаан таларга 4 №-дээх Квартальнай элбэх мандааттаах быыбардыыр уокурукка биир кандидат регистрацияланна – Дмитриева Елена Анатольевна (Бүтүн Россиятааҕы «Единая Россия» политическай партия Томпо оройуонунааҕы салаатыттан). Быыбардыыр хамыыһыйаҕа бэйэни туруоруу бэрээдэгинэн регистрацияланаары Ружникова Снежана Валентиновна докумуоннарын туттарда.
Томпо оройуонун «Дьабарыкы Хайа» МТ 2 №-дээх элбэх мандааттаах быыбардыыр уокурук депутаттарын талар эбии быыбар туһунан этэр буоллахха, бу нэһилиэккэ быыбарга бэлэмнэниини уонна быыбары 551 №-дээх быыбардыыр хамыыһыйа тэрийэр. Быыбар хамыыһыйата «Единая Россия» политическай партия Томпо оройуонунааҕы салаата туруорбут Евстратова Анна Юрьевнаттан уонна Черникова Людмила Александровнаттан, бэйэни туруорунуу бэрээдэгинэн Карнаухов Андрей Александровичтан уонна Сижук Ирина Анатольевнаттан регистрациялыырга докумуоннарын тутта. Бу уокурукка Дьабарыкы Хайа бөһүөлэгин бэрэстэбиитэллээх уорганыгар барыта 3 депутат талыллыахтаах.
Быыбардааччы өрөспүү-бүлүкэҕэ олорор уонна быыбар буолар күнүгэр олорор (регистрациялаах) сириттэн атын сиргэ, ол гынан баран өрөспүүбүлүкэ иһигэр баар буолар буоллаҕына, ханна баар сиригэр быыбардыыр учаастакка тиийэн быыбардыыр кыахтаах. Итиниэхэ быыбар иннинэ ханнык баҕарар территориальнай эбэтэр учаастактааҕы быыбардыыр хамыыһыйаҕа Саха Өрөспүүбүлүкэтин баһылыгын уонна СӨ норуот депутаттарын быыбарыгар кыттар быыбардааччылар испииһэктэригэр киллэртэрэр гына сайабылыанньа биэриэхтээх («Мобильный избиратель» механизмынан). Сайабылыанньаны өрөспүүбүлүкэ МФЦ-гар уонна государственнай уонна муниципальнай өҥөнү оҥорор биир кэлим портал (ЕПГУ) нөҥүө биэриэххэ эмиэ сөп диэн санатабыт.
Быыбар саҕана баар сиргитигэр быыбардааччылар испииһэктэригэр киллэрэргэ сайабылыанньаны 2023 с. от ыйын 24 күнүттэн балаҕан ыйын 4 күнүгэр диэри ханнык баҕарар территориальнай быыбардыыр хамыыһыйа, өрөспүүбүлүкэ ханнык ба-ҕарар МФЦ-гар уонна государственнай уонна муниципальнай өҥөнү оҥорор биир кэлим порталын (ЕПГУ) нөҥүө сайабылыанньаны ылар пууҥҥа биэриэххэ сөп. Оттон атырдьах ыйын 30 күнүттэн балаҕан ыйын 4 күнүгэр 14.00 чааска диэри сайабылыанньаны учаастактааҕы быыбардыыр хамыыһыйаҕа биэриэххитин сөп.
Итиниэхэ сайабылыанньа тутар хайа баҕарар пууҥҥа кэлэн Россия гражданинын пааспарын (пааспар уларыта сылдьар буоллаххытына – быстах кэмҥэ оҥоһуллар дастабырыанньаны) көрдөрөҕүт. Сайабылыанньаны илиигитинэн биитэр быыбардыыр хамыыһыйа (ТИК, УИК), МФЦ компьютерыгар компьютер ааҕар кодтаах гына бэччээттэтэн толоруоххутун сөп.
Быыбардааччыга баар сиргитигэр куоластыырга сайабылыанньаны биирдэ эрэ биэрэр наадатын санатабыт.
Томпо оройуонун территориальнай быыбардыыр хамыыһыйата.