Байаҕантай нэһилиэгэр бүгүн, алтынньы 4 күнүгэр 11 чаастан олохтоох көҕүлээһиннэри өйүүр программанан уонна нэһилиэнньэ көмөтүнэн тутуллубут Учуутал скверин үөрүүлээх аһыллыыта буолла.
2022 сыллаах Кириэс Халдьаайы орто оскуолатын юбилейдаах выпусктара дизайн-проект оҥоруутун спонсордаабыттара. 2023 сыллаах юбилейдаах выпусктар стендэлэрин таҥыытын уонна тиэйэн аҕалыытын үбүлээбиттэрэ. Махтал манна кыттыспыт нэһилиэк олохтоохторугар, урбаанньытарга, биир дойдулаахтарбытыгар уонна юбилейдаах выпусктарбытыгар. Учуутал Скверин лиэнтэтин быһарга чиэс бэрилиннэ «Байаҕантай» МТ баһылыга Лена Дмитриевна Голиковаҕа, ветеран учууталга, өр кэмҥэ оскуолабыт директорынан үлэлээбит Александр Фёдорович Охлопковка, оскуола директорыгар Святослав Артурович Слепцовка, оскуола президенэ Валерия Винокуроваҕа, туйгун үөрэнээччи Лиана Атаковаҕа.
«Байаҕантай » МТ баһылыга Лена Голикова орто оскуола коллективыгар тутуу материалын ылалларыгар 120 тыһ. солк. сертификаты уонна 2024 сылга юбилейдаах выпусктар саҥа теплица тутуутугар 211 тыһ. солк. сертификаты туттардылар. Элбэх үтүө тыл этилиннэ, эҕэрдэ ырыалар ылланнылар, хоһооннор ааҕылыннылар. Учуутал скверигэр өр кэмнэргэ Кириэс Халдьаайы оскуолатыгар учууталлаабыт Саха АССР, РСФСР үтүөлээх учуутала, Байаҕантай нэһилиэгин бочуоттаах олохтооҕо Елена Михайловна Охлопкова аатын иҥэрэргэ уураах таҕыста. Бастакы мастары Сквербитигэр экология, биология киинин үөрэнээччилэрэ олортулар. Учууталбыт скверин тутуутун Николай Николаевич Атаков, Дмитрий Дмитриевич Максимов оҥордулар.
Кэлэн иһэр Учуутал күнүнэн Байаҕантай нэһилиэгин бары учууталларын итиитик -истиҥик нэһилиэк олохтоохторун аатыттан эҕэрдэлиибит. Үөрүү -көтүү үктэллэниҥ, дойдубут сылаас тыынынан угуттанан сырдыгынан сыдьаайа сылдьыҥ!
Альбина Баланова