Тохсунньу 4 күнүгэр «Байаҕантай» норуот айымньытын киинигэр Томпо оройуонугар 2024 сылга биллэриллибит Ийэ сылын өрө көтөҕүллүүлээхтик түмүктээҺин буолла.
«Күн сирин күндүтүн» кинигэни педагогическай үлэ ветерана, Байаҕантай нэһилиэгин бочуоттаах олохтооҕо Ягодина Елизавета Викторовна хомуйан таһаартарда. Бу күн кинигэ сүрэхтэниитэ буолла. Кинигэҕэ элбэх оҕолоох биһиги эбээлэрбит, ийэлэрбит, эдэр ийэлэр туһунан суруллан киирдэ. Үйэлэргэ күндү дьоммут аатын ааттатар кинигэни таһаарбытынан Елизавета Викторовнаҕа махтал тыллара ананна. Истиҥ кэпсэтиини түөрт уол оҕо иһирэх ийэтэ Надежда Жегусова салайан ыытта.Кинигэ сүрэхтэниитигэр күндү ийэлэрбитигэр ананар элбэх иһирэх тыл этилиннэ. «Алдаана» ансаамбыл, «Байаҕантай» эдэр ыччат үҥкүүһүттэрин ансаамбыла, Кириэс Халдьаайы оскуолатын коллективын хомусчуттарын бөлөҕө эҕэрдэ нүөмэрдэрин анаатылар. Ийэлэрбит аатын үйэтитэр кинигэни ылан дьиэ кэргэҥҥэ үүммүт сылынан күндү бэлэх, өйдөбүнньүк буолла.
Презентация кэннэ эдэр ийэлэргэ «Күндү ийэҕэ тапталынан» күрэх буолла. Барыта биэс ийэ кытынна. Күрэхпитин кыттааччы ийэлэрбит Хаарчаана үҥкүүтүнэн сэргэхтик арыйдылар.Сэрэбиэй түмүгүнэн кыргыттар маннык таҕыстылар: Надежда Какаисова кыраайы үөрэтэр түмэл солбуллубат тутаах үлэһитэ, үс оҕо ийэтэ, нэһилиэкпит биир бастыҥ эдэр ыччата. Мария Попова «Байаҕантай» НАК сүрүн специалиһэ, икки оҕо ийэтэ, уус -уран самодеятельность актыыбынай кыттыылааҕа, Прасковья Находкина орто оскуола директорын сүбэһитэ, педагог-тэрийээччи, икки оҕо тапталлаах ийэтэ, Антонина Бурцева Үөгэн ситэтэ суох сүрүн оскуолатын биир бастыҥ тутаах үлэһитэ, түөрт оҕо амарах ийэтэ, оройуон бастыҥ спортсменката, ырыаһыта. Жанна Колесова оскуола ырааһы көрөр инструктора, үс оҕо амарах ийэтэ, оройуон бастыҥ иистэнньэҥэ. Дьүүллүүр сүбэҕэ Сардаана Семеновна Атакова, Сахабыт сирин Далбар Хотуна, урбаанньыт, Валентина Афанасьевна Борисова, участковай балыыһа медсестрата, «Алдаана» ансамбыл солбуллубат ырыаһыта, Елена Петровна Кривошапкина Үөгэн култуурунай- спортивнай сырдатар киинин директора үлэлээтилэр.Талааны көрөр түһүмэххэ кыргыттарбыт бары талааннарынан сөхтөрдүлэр. Көрөөччүлэр илиилэрэ хабыллан тахсыаҕар диэри таһыннылар. Ол курдук, Надежда дьиэ кэргэнинээн сахалыы норуот ырыатын толордулар . Мария оҕотунаан, аймахтарын кытта оҥоһуктарын көрдөрөн дьон биһирэбилин ылыан ылла. Прасковья бу да сырыыга талаанынан дьону соһутта, үөртэ-көтүттэ. Көрдөөх монологу аахта. Киниэхэ оҕолоро көмөлөстүлэр уонна блогер буолан бэйэтин каналыттан дьиэ кэргэнинээн иллэҥ кэмнэригэр оонньууларын устубуттарын көрдөрдө.Дьон сэҥээриитин ылла. Антонина кэргэнинээн Алексейдыын дуэттара биһирэниэн биһирэннэ.Жанна хомуска оонньоон лыҥкынатан ытыс тыаһынан доҕуһуолланна. Ситуацияларга бары сөптөөх толору хоруйу биэрдилэр.Көрдөөх эстафетаҕа сарсыардааҥҥы ыксалы бары этэҥҥэ туораатылар, ол курдук оҕурсууттан салаат оҥордулар, онтон оҕолорун дьиэтээҕи үлэтин көмөлөһөн суоттаатылар,таҥаска түспүт тимэхтэри хаачыстыбалаахтык тиктилэр, оҕолорун халыҥнык таҥыннаран оскуолаҕа атаардылар. Манна саамай түргэн туттуулаах ийэ Жанна Колесова буолла. Онтон ийэлэрбит кэрэ сэбэрэлэрин көрдөрөр киэһээҥҥи былааччыйаларын көрдөрүү буолла . Кинилэр Ариан Атастыров ырыатыгар доҕуһуоллатан бииртэн биир кэрэ көстүүлэринэн көрөөччүлэри сөхтөрдүлэр. Дьүүллүүр сүбэ быһаарыытынан түмүк маннык буолла:бастакы миэстэ Прасковья Находкина , иккис Антонина Бурцева, үһүс миэстэ Жанна Колесова, Мария Попова, Надежда Какаисова. Барыларыгар «Байаҕантай» МТ тэриллии баһылыга Лена Дмитриевна туруорбут ЖК телевизордара туттарылыннылар , ону тэҥэ үлэлиир тэрилтэлэрэ, аймахтара, табаарыстара үгүс элбэх бэлэхтэри бу дьоро киэһэ туттартаан кыргыттарбыт үөрүүлэрэ үксээтэ. Бу күҥҥэ элбэх ырыа ылланна: «Алдаана», НАК киинин ансаамбылларын толорууларыгар, Туйаара Заболоцкая, Ариан Атастыров, Данил Мегинов. Күрэҕи Альбина Баланова, Ариан Атастыров иилээн-саҕалаан ыыттылар. Бары биһигини кытары бииргэ буолбут кэрэ ийэлэрбитигэр, күндү, сэргэх көрөөччүлэрбитигэр истиҥ махтал тылларын этэбит.Үөрүү -көтүү үксээтин, барыгытын дьол кыыма кууһуохтун!
Альбина Баланова