В.А.Штыров аатынан Томпо оройуонун элбэх хайысхалаах гимназиятыгар биллиилээх общественнай деятель Е.Д.Кычкин 95 сылыгар аналлаах l оройуоннааҕы «Басхан-2024» дьыалабай оонньуу ыытылынна. Күрэх сүрүн сыалынан уопсастыбаҕа уол оҕо оруолун үрдэтии, өй-санаа өттүнэн сайыннарыы буолар.
Кыттааччылар биэс түһүмэххэ тургутууну аастылар. Ол курдук, төрдү-ууһу билиһиннэрии, дойду салайааччыларын туһунан тус санаа этиннэрии, өйү тургутуу, бэриллибит тиэмэҕэ кэпсэтии, айар үлэҕэ холонуу. Оонньуу төрөөбүт тылынан ыытыллыбыта улахан сэҥээриини таһаарда. Дьүүллүүр Сүбэ кытаанах сыаналааһынын түмүгүнэн, бары кыттааччыларга «Удьуор утума салҕыыр БАСХАН» — Сидоров Максимҥа (Е.Е.Протопопов аатынан Саһыл орто оскуолата), «Хомоҕой тыл БАСХАНА» — Уткин Алексейга (Е.Е.Протопопов аатынан Саһыл орто оскуолата), «Кэскиллээх кыттааччы» — Сивцев Дамирга (Герой Ф.М.Охлопков аатынан Кириэс Халдьаайы орто оскуолата), «Киэҥ көрүүлээх БАСХАН” — Константинов Несторга (Герой Ф.М.Охлопков аатынан Кириэс Халдьаайы орто оскуолата) «Кэрэхсэбиллээх кыттааччы» — Павлов Димаҕа (Томпо оройуонун элбэх хайысхалаах гимназията), «Тобуллаҕас толкуй БАСХАНА” — Иванов Никитаҕа (Е.П.Неймохов аатынан Мэҥэ-Алдан орто оскуолата) анал аат иҥэрилиннэ. Муҥутуур кыайыылааҕынан Е.П.Неймохов аатынан Мэҥэ-Алдан орто оскуолатын 9 кылааһын үөрэнээччитэ Егоров Альберт ааттанна. Маннык күрэх төрөөбүт дойдуга үтүө сыһыаҥҥа, тапталга үөрэтэр. Киэҥ эйгэҕэ тахсарга, тус бэйэ сайдыытыгар улахан көмө буолар. Тэрийээччилэр ааттарыттан, чуолаан гимназия директоры иитэр үлэҕэ солбуйааччытыгар, күрэҕи тэрийбит Анна Гоголеваҕа дириҥ махталбытын тиэрдэбит.
Лена Слепцова