Сэбиэскэй кэмҥэ Эйэ, Үлэ уонна Күөх Маай бырааһынньыга бүтүн дойду үрдүнэн үрдүк таһымнаахтык ыытыллара. Ол кэминээҕи бырааһынньык туһунан РФ үөрэҕириитин бочуоттаах үлэһитэ Ефимова Прасковья Сидоровнаттан ахтан-санаан ааһарыгар көрдөстүбүт:
- Маай, Күөх Маай… Оччотооҕу ыраах 80-с сылларга мэлдьи күүтүүлээх, долгутуулаах, өрө күүрүүлээх күн. Эрдэттэн бэлэмнэнии: тыаттан мутукча киллэрэн түннүккэ көҕөрдүү, кыһыл таҥас атыылаһан транспараннары, былаахтары оҥоруу, холууп кырыйыы, шариктары үрүү. Дьэ онтон күүтүүлээх күммүт үүнэр. Тоҕо эрэ мэлдьи былыта суох чаҕылхай күн буолааччы. Сарсыардаттан уулуссаҕа олохтоох Сэбиэт таһынааҕы остуолбаҕа ыйанан турар араадьыйа ырыата-тойуга ырааппыт буолар. «Москва майская» ырыа хас биирдиибит сүрэҕин-быарын үөрүүнэн толорор. 10 чаастан Мэҥэ Алдан оскуола дьиэтин таһыгар нэһилиэк олохтоохторо турардыын-турбаттыын мусталлар, холуоннанан тураллар. Демонстрацияны сүрүннээччи, солбуллубат салайааччы оскуола военруга Владимир Гаврильевич Сыромятников сүүрэр- көтөр, солбуллубат фотограф уонна кинооператор оскуола директора Пантелеймон Романович Дарбасов устар. Холуонна иннигэр 15 союзнай республикалар былаахтарын күөрэччи көтөхпүт уолаттар, партия уонна правительство салайааччыларын мэтириэттэрин туппут дьон, онтон сэрии бэтэрээннэрэ, араас транспараннары, шариктары туппут үлэ кэллэктииптэрэ, оскуола оҕолоро, кэлээскэҕэ оҕолорун анньан эдэркээн ийэлэр, тайахтаах кырдьаҕастар да сомоҕолоһо хаамсаллар. Үөрүү- көтүү, сүргэ көтөҕүллүүтэ… Ырыа-тойук ыллаан, уруй-айхал тылларын хаһыытаан бырааьынньыктааҕы сэлэлии хаамыы кулууп таһынааҕы сэрии өйдөбүнньүгүн пааматынньыгар кэлэр. Олохтоох диктор Евсей Александрович Кривошапкин уоттаах-төлөннөөх лозуннары этэрин холуонна дьоно хаба тардан «Ураа!» хаһыытыыллар. НэҺилиэк сэбиэтин бэрэссэдээтэлэ Афанасий Афанасьевич Томтосов дьонун-сэргэтин Күөх Маай бырааһынньыгынан эҕэрдэлиир. Тэрилтэ салайааччылара, сэрии бэтэрээннэрэ, үлэ бастыҥнара тыл этэллэр. Пионердар эҕэрдэ тыл этэн кыһыл хаалтыстара тыалга тэлимниир.
Үлэ уонна сандал Саас бырааһынньыгар норуот күүлэйэ салҕанар: параадка тэрилтэлэр икки ардыларыгар холуонна киэргэтиитин уонна көстүүмнэри көрүү күрэҕэ, кэнсиэр, атыы-эргиэн дьаарбаҥката, оҕолор өҥнөөх миэлинэн тротуарга уруһуйдара, сомоҕолоһуу оһуохайа… Онтон стадиоҥҥа спортивнай күрэхтэһии, киэһэ кулууп дьиэтигэр уус-уран самодеятельность улахан кэнсиэрэ. Ол ааспыт сэбиэскэй кэммит Күөх Маайа ити курдук өрө көтөҕүүлээхтик ааһара…
Лена Слепцова.