Мин таптыыр учууталым Фекла Ивановна Еремеева. Кини миигин түөрт сыл устата билии суолугар сирдээн, үөрэтэн кэллэ. Фекла Ивановна дириҥ билиилээх учуутал. Биһигини алыптаах музыка эйгэтигэр, уустук ахсаан суотугар, төрөөбүт төрүт тыл умсулҕаныгар үөрэтэр-такайар. Кини Саха сирин Ил Дархан гранынан бэлиэтэммитэ. Өссө кини билигин Үөгэн сүрүн оскуолатыгар учууталларга сүбэһитинэн үлэлиир. Мин 2023 сыллаахха “Ступеньки к творчеству» республикатааҕы НПК-ҕа Дьокуускай куоракка кыттан үһүс степеннээх диплому ылан, элбэҕи көрөн-истэн кэлбитим. Араас олимпиадаларга, күрэхтэргэ ситиһиилээхтик кыттабын. Онон учууталбар махталым улахан!
Савелий Слепцов, Үөгэн сүрүн оскуолатын төрдүс кылаас үөрэнээччитэ.
Миигин бастакы кылаастан үөрэтэр учууталым Саргылана Васильевна Слепцова буолар. Иккис кылааска дылы иккиэ буолан Айхаллыын үөрэммиппит. Быйылгыттан кини атын оскуолаҕа үөрэнэ барбыта. Саргылана Васильевна биһигини ааҕарга, суруйарга, суоттуурга үөрэппитэ. Билигин даҕаны күн ахсын учууталбыттан саҥаттан саҥаны истэбин, элбэҕи эбинэн иһэбин. Кини миэхэ биэрбит киэҥ билиитин иҥэринэн үөрэхпэр элбэх ситиһиилэрдээхпин. Мин үөрэхтээх киһи буоларбар сүрдээҕин кыһаллан үөрэтэр. Саргылана Васильевна олус сэмэй, судургу, көнө, чиэһинэй майгылаах. Мин учууталбынан киэҥ туттабын, махтанабын!
Күннэй Кириллина, Үөгэн сүрүн оскуолатын үһүс кылааһын үөрэнээччитэ. Томпо оройуонун Ударник бөһүөлэгэ.
Алтынньы 4 күнэ.