Кулун тутар 22 күнүттэн муус устар 5 күнүгэр дылы Томпо улууһун көҥүл тустуутун иитиллээччилэрэ Дагестан уонна Хотугу Осетия республикаларыгар баран кэллилэр. Кинилэр онно үөрэтэр-эрчийэр түмсүүгэ сырыттылар.
14 оҕо: Кириэс Халдьаайыттан 6, Сайдыыттан 4 уонна Хаандыгаттан 4 оҕо бара сырыттылар. Кинилэри тренердэр Неустроев Дь.С, Саввин В.Н. уонна Томпо улууһун тустууга федерациятын президенэ Моторин А.С. салайан илдьибиттэрэ.
Сборбутун икки гына аҥардаатыбыт, ол курдук биир нэдиэлэ Дагестан Хасавюрт куоратыгар «Спартак» спортивнай интернат- оскуолатыгар дьарыктанныбыт. Иккис нэдиэлэбитигэр Хотугу Осетия Владикавказ куоратыгар бардыбыт.
Күҥҥнэ иккитэ дьарыктанныбыт. Уолаттар Кавказ оҕолорун кытта тэҥҥэ дьарыктаннылар. Хайаҕа кросстаатылар. Уолаттар инникитин Кавказ оҕолорун кытта тусталларыгар бу дьарык туһалаах буолуо дии саныыбын.
Виталий Саввин, тренер