Балаҕан ыйын 2 күнүгэр Таатта уонна Томпо улуустарын оскуолаларын маҥнайгы кылааска киирбит үөрэнээччилэригэр Саха Өрөспүүбүлүкэтин бар дьонун дьокутаата, “Саханефтегазсбыт” АУо генеральнай дириэктэрэ Виктор Лебедев аатыттан өйдөбүнньүк бэлэхтэр туттарылыннылар.
Бу Виктор Николаевич бар дьон дьокутаатынан талыллыбыт бастакы болдьоҕуттан олохтообут үтүө үгэһэ быйыл алтыс сылын салҕанар. Ол курдук, Билии күнүнэн эҕэрдэни уонна өйдөбүнньүк бэлэҕи быйыл икки улууска холбоон 360-ча кырачаан тутар. Суола-ииһэ мөлтөх, уһук нэһилиэктэргэ бэлэхтэр бырааһынньык кэнниттэн тиийдилэр уонна хас биирдии, оскуолаҕа быйыл киирбит кырачааҥҥа тигистилэр.
Манна даҕатан эттэххэ, бар дьон дьокутаата сыл аайы оскуоланы мэтээллээх бүтэрбит бастыҥ үөрэнээччилэри уонна учууталлары эмиэ бэлиэтиир үтүө үгэстээх. Быйыл икки улуус 15 бастыҥ выпускнига өйдөбүнньүк бэлэхтэри, махтал суруктары туппуттара.
2024 с. улуус бастыҥ выпускниктарын ахсааныгар киирбиттэрэ: кыһыл көмүс мэтээллээх Тааттатааҕы лицейтэн Валерия Тарасенко, үрүҥ көмүс мэтээллээхтэр — Анна Жуллярова уонна Марианна Торговкина, 1№-дээх Ытык — Күөл орто оскуолатыттан Диана Попова, Чычымахтааҕы орто оскуолаттан Диана Павлова уонна Амгана Хаптагаева, Баайаҕа орто оскуолатыттан Асулу Винокурова.
Томпо оройуонуттан 5 оҕо кыһыл көмүс мэтээллээх, олор истэригэр «В.А.Штыров аатынан Томпотооҕу үгүс профиллаах гимназия” выпускниктара Алина Зайдуллина, Полина Таипова, “Сэбиэскэй Сойуус Геройа Ф.М Охлопков аатынан Кириэс-Халдьаайытааҕы орто оскуола” выпускниктара Нарыяна Бурцева, Сандаара Слепцова, “Дьабарыкы Хайа орто оскуолатын” выпускнига Марина Банецкая бааллар. Ону таһынан икки оҕо — «В.А.Штыров аатынан Томпотооҕу үгүс профиллаах гимназия” выпускниктара Мариетта Старостина, Малика Насридинова, “Е.П.Неймохов аатынан Мэнэ Алдан орто оскуолатын” выпускнига Комина Лилия үрүҥ көмүс мэтээллээхтэр.
Екатерина Григорьева