Екатерина Петровна уола ыал буолан көһүөҕүттэн бу үс хостоох дьиэҕэ соҕотохсуйда, инньэ гынан устудьуоннар уопсайдарыгар баран: «Тулаайах, кыһалҕалаах оҕоҕо өйөбүл буолуохпун сөп», — диэн биллэриитин ыйаан кэбистэ. Өр-өтөр буолбата, хас да оҕо суруйда, кыһалҕаларын этэллэр. Кимиэхэ эрэ харчы иэс биэрдэ, кимиэхэ эрэ сүбэлээтэ.
Болҕомтото биир кыыска тохтоото. «Мин тулаайахпын, таптыыр уолум быраҕан атын кыыһы кэргэн ылбыта. Мин киниттэн оҕо күүтэбин, сотору балыыһаҕа киирэрим буолуо. Оҕобун кытта тахсан олорор сирим суох, тугу сүбэлиэҥ этэй?», — диэн сурук батсаабыгар тахсан кэллэ. Екатерина Петровна бу кыыһы наһаа аһынна, устунан суруйсан киирэн бардылар.
Кыыс аата эмиэ Катя эбит, Бүлүү детдомугар улааппыт, быйыл үрдүк үөрэҕи бүтэриэхтээх эбит. Катенька этэҥҥэ быыһанан уол оҕону төрөппүт, иккиэн этэҥҥэлэр үһү, инньэ гынан иккиэннэрин дьиэтигэр таһаарда.
Уолун хоһугар киллэрэн баран, иккистээн киирбитэ, кыыһа ытыы олорор эбит. Соһуйуу бөҕөтүн соһуйда. Катя кини уолун Эдик хаартыскатын көрө-көрө ытыыр эбит. «Бу оҕом аҕата олоро», – диэн баран эмиэ ытаан барда. Екатерина Петровна бэйэтэ да соһуйан, долгуйда аҕай, аны сиэнин булан ылбыт дии. Айманан баран уоскуйдулар.
Екатерина Петровна сиэниттэн хараҕа арахпат, аҕатыгар майгынныыр. Катенька дипломнайын суруйа сылдьар, Екатерина Петровна уола, кийиитэ Москваҕа олороллор. Бакаа тугу да этэ илик. Икки Катялар күө-дьаа чэйдииллэр, дьиэ үлэтин, сууйууну-сотууну эдэр киһи начаас оҥорор.
Номнуо саас буолан, от-мас көҕөрөн эрэр, үһүөн таһырдьа күүлэйдииллэр. Кыра киһибит түөрт ыйыгар чугаһаата, аата эмиэ Эдик диэн, күннэрэ-ыйдара киниттэн тахсар. Катя дипломнайын көмүскээн, нуучча тылын учуутала буолла. Куоракка миэстэ көстөн күһүнүн үлэҕэ киирдэ. Бу тухары сүбэлэһэн улахан Эдикка тугу да эппэтилэр. Эдик оҕоломмута эмиэ биллибэт.
Бу курдук суулаһан олорон икки сыл ааһа оҕуста. Екатерина Петровна дьиэтин сиэнигэр анаан докумуон оҥорон кэбистэ. Биир үтүө күн Эдуард ийэтигэр сюрприз оҥороору Москваттан көтөн кэллэ. Тута бэйэтин күлүүһүнэн аһан киирбитэ, ийэтэ суох, хаама барбыт. Хоһугар киирбитэ, оҕолоох кыыс утуйа сыталлар. Өйдөөн көрбүтэ, кини быраҕан барбыт Катята эбит. Итэҕэйбэккэ таалан турдаҕына, аны Катя уһуктан соһуйан хаһытыы түстэ, оҕо уһуктан ытаата. Аны ааҥҥа Екатерина Петровна айаҕын атан, хараҕа улаатан турар эбит! Дьиҥнээх сюрприз диэн манна буолла! Уоскуйан, өйдөһөн, чэйдии олорон, күлсүү бөҕө буоллулар.
Эдуард хараҕа оҕотуттан арахат. Кини оҕо сааһын санатар минньигэс да киһи баар эбит. Эдуард Катенькатыгар бырастыы гыннаран хаалар буолла, сюрприз оҥороору бэйэтэ сюрпризка түбэстэ!
ДОЛГУНЧА