П.А.Ойуунускай аатынан литература судаарыстыбаннай түмэлигэр тохсунньу ый 24 күнүгэр Анастасия Саввична Сыромятникова төрөөбүтэ 110 сылыгар аналлаах ахтыы киэһэтэ буолла. Ахтыы киэһэтин саха норуодунай бэйиэтэ Наталья Ивановна Харлампьева иилээн-саҕалаан ыытта.
Суруйааччыны кытта алтыспыт кэмнэрин норуодунай суруйааччы, литературнай түмэл дириэктэрэ Николай Алексеевич Лугинов, норуодунай суруйааччы Слепцова Елена Васильевна – Куорсуннаах, суруналыыс, тылбаасчыт, литератураны ырытааччы Шапошникова Аита Ефимовна уонна биир дойдулаахпыт бэйиэт, кэпсээнньит, СӨ үтүөлээх суруналыыһа, «Көмүөл» кинигэ кыһатын тэрийээччитэ Павлов Борис Иванович истиҥник кэпсээтилэр.
Анастасия Саввична төрөөбүт дойдутуттан СӨ социальнай сулууспатын туйгуна, СӨ гражданскай уонна судаарыстыбаннай сулууспатын туйгуна, СӨ хаһаайыстыбатын үтүөлээх үлэһитэ, Томпо оройуонун бочуоттаах олохтооҕо Николай Егорович Ефимов, Анастасия Саввична аатынан Арыы-Толоон сүрүн оскуолатын дириэктэрэ Виталий Пантелеймонович Слепцов, оскуола выпускниктара Алевтина Николаева уонна сиэн аймаҕа Галина Неустроева ахтан-санаан, ирэ-хоро дуоһуйа кэпсээтилэр.
Суруйааччы олоҕун, айар үлэтин туһунан быыстапка көрдөрүлүннэ.
Ахтыы биэчэрэ ис киирбэхтик, сылаас тыынынан ааста.
Александра Ефимова