Кулун тутар 4–5 күнүгэр Дьокуускай куоракка 14-с төгүлүн ыытыллар өрөспүүбүлүкэтээҕи Маастар күнүгэр Томпо оройуонун делегациятыгар киирэн «Сиэл сипсиэрэ» бөлөх быыстапка-дьаарбаҥкаҕа кыттан кэллибит.
Томпо оройуонуттан Тополинайтан норуот маастара Антонина Левина таба тыһыттан паннолара, сайыҥҥы сарыы соно, бэргэһэлэрэ, Мэҥэ Алдантан тимир ууҺа Альберт Иванович Захаров Мэҥэ Алдан сата тааһын уһааран оҥорбут быһахтара, батыйата, Татьяна Колодезникова сиэлинэн оҥорбут куукулалара, Колодезникова М.И. сиэлинэн сөрүөтэ, паннолара, кылынан суумката, сэлээппэлэрэ, дэйбиирэ, Павлова В.И. сиэлинэн паннота, кылынан тюбетейката, Тарасова В.П. кыбытыгынан панноллаах суумката, Хоноехова А.М. кылынан илин-кэлин кэбиһэрдэрэ, сэлээппэлэрэ уонна «Сиэл сипсиэрэ» бөлөх ат киэргэлэ үлэлэрэ быыстапка-дьаарбаҥкаҕа турдулар.
А.Е. Кулаковскай аатынан норуот айымньытын киинигэр өрөспүүбүлүкэ араас муннугуттан 600 талыы-талба талааннаах дьоно үс күн устата бэйэлэрин үлэлэрин туруордулар, дьоҥҥо-сэргэҕэ, дьүллүүр сүбэҕэ кэпсээтилэр, көрдөрдүлэр.
«Сиэл сипсиэрэ» бөлөх туһунан кылгастык кэпсээтэххэ маннык. 2021 сыллаахха Байаҕантай ыһыаҕын көрсө олохтоох Е.П. Неймохов аатынан түмэл үлэһитэ Антонина Ефремова көҕүлээһинэн сиэлинэн-кылынан сөбүлээн дьарыктанар далбар хотуттары мунньан бэрт кылгас кэм иҺигэр ат симэҕин оҥорон, онтон ыла «Сиэл сипсиэрэ» диэн бөлөхтөнөн хаалбыппыт.
Иккис эрэ сылбыт диэтэххэ, үлэбит да, ситиһиибит да элбэх. Ол курдук 2022 сылга «Утум ситимэ» диэн өрөспүүбүлүкэтээҕи кэтэхтэн бэстибээлгэ Гран-при ылбыппыт.
Маастар күнүгэр Колодезникова Т.И., Захаров А.И. уонна Левина А.Г илии тутуурдаах, өттүк харалаах ситиһиилэнэн кэллилэр.
2023 с. Колодезникова Т.И. Өймөкөөҥҥө Олоҥхо ыһыаҕар «Олоҥхо эйгэтэ «үлэтэ иккис миэстэ, «Олоҥхо АРТ» конкурска Гран-при, «Көмүс сүүтүк» хаартысканан күрэххэ Павлова В.И., Хоноехова А.М. иккис, үһүс степеннээх дипломнара, Кириэс Халдьаайыга буолбут оройуоннай ыһыахха – бочуоттаах миэстэлэр.
Татьяна Иннокентьевна уонна Антонина Гаврильевна үлэлэрэ «Симэх» галереяҕа эксклюзивнай үлэлэргэ киирсэн, быыстапкаҕа турар буоллулар уонна дойдубут тэбэр сүрэҕэр Москва куоракка быыстапкаҕа айанныыллар диэн үөрүүлээх сонуну иһитиннэрдэ галерея дириэктэрэ Яна Игнатьева.
Быыстапкаҕа баран элбэҕи билэн-көрөн,талааннаах далбардары кытары кэпсэтэн, бэйэбитин да көрдөрөн опыт атастаһан кэллибит.
Биһигини өйөөн күүс-көмө буолбут оройуоннааҕы култуура управлениетын начальнигар Бодруг Ирина Михайловнаҕа, култуура управлениетын специалиһыгар Афанасьева Нарыйа Гаврильевнаҕа, Е.П. Неймохов аатынан олохтоох түмэл директорыгар Комиссарова Мотрена Германовнаҕа, специалистарга Ефремова Антонина Петровнаҕа, Кривошапкина Диана Николаевнаҕа уонна сымнаҕас олбохтоох массыына суоппарыгар Афоняҕа улахан махталбытын тиэрдэбит.
Баҕарабыт үлэҕитигэр үрдүк ситиһиилэри, кытаанах доруобуйаны!
Айталина Боронукская