Үөрэх дьыла түмүктэнэн, үөрэнээччилэр сайыҥҥы сынньалаҥнара саҕаланна. Оҕо көмүскэлин күнүгэр сайыҥҥы сынньалаҥ аһыллыытын биир кэлим тэрээһинигэр оройуон үрдүнэн оҕо лааҕырдара уонна былаһааккалара ааннарын тэлэччи астылар.
Быйыл сайын Томпо оройуонун үөрэҕин тэрилтэлэригэр уон биир күнүскү лааҕыр үлэлиэҕэ. Ол курдук, сайын устата 375 оҕо хабыллан сынньаныаҕа.
Мэҥэ-Алдан орто оскуолатын “Аргыс”, Кириэс Халдьаайы орто оскуолатын «Байаҕантай кэскилэ» үлэ лааҕырдарын иитиллээччилэрэ араас оҕуруот аһын үүннэрэн бүөбэйдиэхтэрэ.
Томпо оройуонун элбэх хайысхалаах гимназиятын «Исток» лааҕырын оҕолоро Хаандыга бөһүөлэгэ ыраас буолуутун хааччыйыахтара.
Хаандыга орто оскуолатын “Оҕо планетата», Тополинай орто оскуолатын «Кустук», Дьабарыкы Хайа орто оскуолатын “Искорка”, Саһыл орто оскуолатын “Кэскил”, Үөгэн сүрүн оскуолатын “Кэскил” лааҕырдарыгар социальнай өттүнэн кыаммат, элбэх оҕолоох ыал оҕолоро хабыллан, анал бырагырааманан чэбдигириини ааһыахтара.
Кириэс Халдьаайы оҕо спортивнай оскуолатын «Боотур», «Алроса» эбии үөрэхтээһин киинин «Сокол» спортивнай хайысхалаах лааҕырдарыгар 50 эдэр спортсмен дьарыктаныаҕа.
Науканы интэриэһиргиир оҕолор Эколого-биологическай киин «Томпо эдэр натуралистара» лааҕырга чинчийии үлэтин ыытыахтара.
Хас биирдии лааҕырга анал иитэр былаанынан биир кэлим күнүн чэрчитинэн араас интэриэһинэй көрсүһүүлэр, тэрээһиннэр ыытыллыахтара.
Маны таһынан, араас хайысхалаах оҕо былааһаккалара эбии үөрэхтээһин тэрилтэлэригэр, киин библиотекаҕа, хайа дьыалатын техникумугар аһылыннылар. Оҕо бары өттүнэн сайдарыгар, идэҕэ туһайыылаах дьарыктар ыытыллаллар. «Өксөкү өрүөлчээннэрэ» анал бырагыраамманан алын сүһүөх кылаас оҕолоро дьарыктаналлар.
Нэһилиэнньэ дьарыктаах буолуу киинин нөҥүө 73 сокуоннай сааһын ситэ илик ыччат сайыҥҥы кэмҥэ быстах үлэ булла. 38 оҕо төрөппүттэрин кытта ыстаадаҕа үлэлииллэр.
Анал байыаннай дьайыыга сылдьар дьиэ кэргэн оҕолоро Хара муора кытыытыгар сынньаныахтара.
Үөрэнээччилэр сайыҥҥы сынньалаҥнарын туһалаахтык, көдьүүстээхтик атааралларыгар сүрүн болҕомто ууруллар.
Лена Слепцова.