Бүгүн, атырдьах ыйын 8 күнүгэр, Саха народнай суруйааччытын Е.П. Неймохов аатынан түмэл дьиэтигэр өрөспүүбүлүкэҕэ киэҥник биллэр мас ууһун Демьян Колодезников уонна кини ийэтин Мэҥэ Алдан бочуоттаах олохтооҕо Анна Алексеевна Колодезникова быыстапкаларын үөрүүлээх быһыыга-майгыга арыллыыта буолла.
Демьян Дмитриевич кулун тутар 27 күнүгэр 1963 сыллаахха Мэҥэ Алдаҥҥа Колодезниковтар дьиэ-кэргэҥҥэ иккис оҕонон күн сирин көрбүтэ.
Билигин кэргэнинээн Екатерина Иннокентьевналыын Хаҥалас улууһун Өктөмүгэр олороллор.
Демьян Дмитриевич биир бастакы үлэтинэн 2010 сыллаахха кэргэнигэр хатыҥтан бэргэhэ уурары оҥорбутун ааттыыр. Онтон ыла бэстэн, тэтиҥтэн дьикти кэрэ, тупсаҕай оҥоһуктары кыhан араастаан быhыылаан оҥорор буолбут. Кэлин удьурҕайтан кыhары баhылаабыт.
2014 сылтан араас таһымнаах куонкурустарга кыттан, дьон сэҥээриитин ылан, бириистээх миэстэлэргэ тиксэр буолан барбыта. Сылтан сыл тиhигин быспакка, үлэлэрин элбэтэн, тупсаран, билигин Өрөспүүбүлүкэҕэ биир биллэр-көстөр мас ууhа буолла.
2019 сыллаахха ыытыллыбыт «Связь поколений» диэн өрөспүүбүлүкэтээҕи куонкуруска кэргэнин Екатерина Иннокентьевна дьиэ-кэргэнин кытары Демьян Дмитриевич ийэтинээн кыттыыны ылбыттара. Бу куонкуруска 2 степеннээх дипломант уонна жюри биһирэбил бирииһинэн наһараадаламмыттара.
2022 сыл түмүгүнэн Өктөмнөр Демьян Дмитриевичка «Сыл маастара» ааты иҥэрбиттэрэ.
Өймөкөөҥҥө буолбут олоҥхо ыһыаҕар «Үлэнэн чэлгийэр Сахам сирэ» өрөспүүбүлүкэтээҕи уус-уран оҥоһуктар күөн күрэстэригэр «Удьурҕайынан оҥоһук» күрэҕэр 2 степеннээх лауреат буолбута.
Быйылгы Амма улууһугар ыытыллыбыт Олоҥхо ыhыаҕар Маастардар түhүлгэлэригэр Ил Дархаммыт Айсен Николаев Демьян Дмитриевич үлэлэрин сэргээбитин туһунан манна биир дойдулаахтара бары үөрэ, киэн тутта истибиппит. «Художественная резьба по дереву» күрэх түмүгэр «Бастыҥ уран оhуор» анал ааты ылбыта.
Быйылгы Туймаада ыһыаҕар «Уран мас ураты ойуура-оhуора» көрүү быыстапкаҕа биһирэбил бириис ылбыта.
2023 сыллаахха өрөспүүбүлүкэтээҕи доруобуйаларыгар хааччахтаах дьон икки ардыгар тэриллибит «Таланты особенных людей Севера» күрэххэ ГРАН-ПРИ үрдүк ааты ылбыта.
Быыстапканы атырдьах ыйын 16 күнүгэр диэри түмэлгэ кэлэн көрөргүтүгэр ыҥырабыт! Демьян Дмитриевич уонна Анна Алексеевна уран тарбахтарынан, илиилэрин сылааһын иҥэрбит оҥоһуктарын кэлэн көрүҥ, сэргээҥ, кэрэхсээҥ!
Мотрена Комиссарова