Бэс ыйын 15 күнүгэр Мэҥэ Алдан тэриллибитэ 115 сылыгар уонна 2024 сыл Арассыыйаҕа Дьиэ кэргэн, Саха Өрөспүүбүлүкэтигэр Оҕо саас сылларыгар аналлаах уйгу-быйаҥ ыһыаҕа ыһылынна. Үөрүүлээх арыллыы тэрээһинэ үрдүк таһымнаахтык ааста.
Ыһыахха 115 киһи хомуска оонньоон, Мэҥэ Алдан гимын ыллаан арыйдылар. Өрөгөй чааһын аһыллыытыгар сиэри-туому ситэрэн алгысчыт Иван Чириков аал уоту оттон, сир-дойду иччилэрин айах тутан алгыстаата. Ыһыах алгыһынан аһыллан, ыалдьыттары саха аһынан күндүлээбиттэрэ, «Ойор күнү батыһан» оһуохайга ыҥырбыттара. Ити курдук, сайыҥҥыллыы сылаас, аламай күн үүнэн, күн уота чаҕылыйа тыган санаабытын өрө көтөхтө. Үөрүүлээх оһуохай кэннэ, П.А. Ойуунускай «Дьулуруйар Ньургун Боотур» олоҥхотуттан быһа тардан, дьүһүйүүлэри көрдөрдүлэр.
Түһүлгэнэн аһааһын кэнниттэн «Киэргэллээх түһүлгэбит кэрэ түгэнэ» диэн саха таҥаһын көрүүтүн күрэҕэ буолла. Ол кэннэ элбэх көрөөччүнү тардар, тыҥааһыннаах киирсиилээх «Өбүгэ оонньуулара» спортивнай күрэс ыытылынна. Манна буулдьанан ытыы, оҕунан ытыы, хапсаҕай, мас тардыһыы киирдилэр. Мас тардыһыыга: 65 киилэҕэ диэри бастакы миэстэ — Заровняев Айсен, иккис миэстэ — Христофоров Данил, үһүс миэстэ — Ордахов Роман; 65 киилэттэн үөһээ бастакы миэстэ — Захаров Павел, иккис миэстэ — Адамчик Влад, үһүс миэстэ — Кривошапкин Юрий. Хапсаҕайга: 70 киилэҕэ диэри бастакы миэстэ — Иванов Виктор, иккис миэстэ — Яковлев Леонид, үһүс миэстэ — Рудых Евгений; 70 киилэттэн үөһээ бастакы миэстэ — Заровняев Айсен, иккис миэстэ — Бурцев Виталий, үһүс миэстэ — Севастьянов Евгений. Ох сааҕа дьахталларга: бастакы миэстэ — Сыромятникова Мария, иккис миэстэ — Рудых Виктория, үһүс миэстэ — Попова Марина. Эр дьоҥҥо: бастакы миэстэ — Егоров Василий, иккис миэстэ — Саввин Егор, үһүс миэстэ — Юмшанов Александр.
Киэһэ күүтүүлээх «Ыал олох тускула» — дьиэ кэргэн икки ардыгар оонньуу күрэҕэ буолла. Күрэхпит кыттааччылара 7 түһүмэххэ сэргэхтик кытыннылар: бэйэни билиһиннэри, көрдөөх оонньуу -легонан тутуу, күлүүс арыйарга күрэхтэһии, таптал таайыыта -дротигынан сүрэҕи ытыы, дьиэ кэргэн баайыыта төһө күүстээх эбитий? Быа баайыыта-сүөрүүтэ, бүтэһик түһүмэх талба талаан буолар. Күрэскэ Александра, Александр Варфоломеевтар дьиэ кэргэн кыайыылаах аатын сүктүлэр. «Чөл олоҕу, спорду көҕүлээччи» анал ааты Мария Сыромятникова кыыһынаан уонна сиэнинээн, «Айар-тутар дьоҕурдаах» анал ааты Екатерина, Егор Алексеевтар дьиэ кэргэттэрэ ыллылар.
Ыһыах бириэмэтигэр олохтоох түмэл хаартыска уонна хартыына быыстапкатын көрдөрүүгэ туруорда.
Алла Саввина.