Сааскы бастакы бырааһынньыгы уруйдуу, Аан дойду дьахталларын күнүгэр, Россияҕа Дьиэ кэргэн, Саха сиригэр Оҕо саас, Томпо оройуонугар Ийэ сылларынан, Үөгэн нэһилиэгин тэриллибитэ 100 сылын чэрчитинэн Үөгэн сынньалаҥ киинигэр Байаҕантай үс нэһилиэгин нарын-намчы ийэлэригэр анаан «Күн-күбэй ийэлэр» күрэх буолан ааста.
Күрэххэ кытыннылар: Кириэс Халдьаайы нэһилиэгиттэн түөрт оҕолоох Надежда Жегусова, үс оҕо амарах ийэтэ Сардаана Бурцева, ыаллыы сытар Арыы Толоон нэһилиэгиттэн түөрт оҕо нарын ийэтэ Мария Канашова,
Үөгэн нэһилиэгиттэн түөрт оҕо күндү ийэтэ Антонина Бурцева, түөрт оҕо кэрэ ийэтэ Июля Павлова кытыннылар.
Күрэх барыта биэс түһүмэхтээх буолла.
Бастакы түһүмэх «Визитка» – презентация көмүскээһинэ. Иккис түһүмэх – «Талба талаан».Үһүс түһүмэх – «Ситуацияттан тахсыы», ыйытыыга хоруйдааһын. Төрдүс түһүмэх – «Ийэ күннээҕи түбүгэ» (мясорубканы ыһыы-хомуйуу, үтүлүк тигиитэ, оҕолорун таҥыннарыы). Бэһис түһүмэх – «Киэһээҥҥи уобарас». Күрэххэ биэс түһүмэх түмүгүнэн бастакы миэстэни ылла Надежда Жегусова, иккис миэстэни – Антонина Бурцева,
үһүс миэстэни – Мария Канашова. Сардана Бурцева, Июля Павлова биһирэбил бириистэри ыыллылар.
Сүрүн бириистэри Байаҕантай нэhилиэгин баhылыга Лена Голикова туруорда.
Күрэх олус кэрэхсэбиллээхтик, үрдүк таһымҥа ааста. Күрэҕи ырыанан киэргэппит Айталина Охлопковаҕа, Юрий Сотрудниковка уонна лотерея оонньоппут биир дойдулаахпытыгар У.В. Басоваҕа барҕа махталбытын тиэрдэбит.
Елена Кривошапкина