Биһиги ааҕааччыларбытыгар РФ үөрэҕириитин бочуоттаах үлэһитэ Ефимова Прасковья Сидоровна пионербаһаатайынан үлэлээбит кэмнэрин туһунан маннык билиһиннэрдэ: «Мин 1984-1989 сс. Мэҥэ-Алдан орто оскуолатыгар пионербаһаатайынан ананан үлэлээбитим. Олег Кошевой аатынан пионерскай дружина 80-ча пионердааҕа. Бастакы сылбар пионерскай этэрээттэри кытта билсии сборун ыыппытым. 4 кылаас — Зоя Космодемьянская, 5 кылаас — Кычан Джакыпов, 6 кылаас — Сима Сергеев, 7 кылаас — Марат Казей аатын сүгэллэрэ. Пионердар бу геройдар олохторун холобур оностоллоро. Уҥа флангаҕа иһэр этэрээт бочуоттаах аатын Сима Сергеев аатынан этэрээт сүгэрэ.
Дружина советын председателлэринэн араас сылларга Липа Березина, Маша Колодезникова, Саша Захаров талыллан үлэлээбиттэрэ. Дружина сэбиэтэ хас понедельник аайы нэдиэлэтээҕи үлэтин былаанныыра, этэрээттэргэ тиэрдэрэ. Пионердар туох баар ыытыллар үлэлэргэ кѳхтѳѳхтүк кытталлара. Активнайа суох эбэтэр үѳрэҕэр мѳлтѳх оҕо сэмэлэнэрэ, кѳннѳрүнэрэ. Бэйэ-бэйэҕэ кѳмѳлѳсүһүү, табаарыстыы сыһыан оҕолорго баара.
«Молния» хаһыат тиһигин быспакка тахсара, онно үлэ-хамнас сырдатыллан иһэрэ. Сэрэдэ аайы «Школа горнистов и барабанщиков» үлэлиирэ. Знаменосецтар, дружина горнистара, барабанщиктара оскуола, нэһилиэк торжественнай чаастарын киэргэтэллэрэ.
Октябреноктарга пионердар, пионердарга улахан кылаас комсомолецтара уонна совхозтан, тэрилтэлэртэн ыччаттар- производственнай баһаатайдар: Оксана Николаева, Слава Хоноехов, Раиса Прокопьева, Надежда Дарбасова уо.д.а.кэлэн баһаатайдыыллара, араас уруоктары, оонньуулары ыыталлара.
Пионерскай дружина үлэтэ күѳстүү оргуйара: этэрээт сбордара, дружиннай сбордар, кѳрсүһүүлэр, күрэхтэһиилэр, концертар, «Будь готов!» станцияларынан оонньуу, пионербол, «Бэлэм буол» хаһыакка сурутуу…
«Аһымал» акция үлэтэ күүскэ барара: Арменияҕа сир хамсааһыныгар күл-кѳмѳр буолбут Спитак куоракка посылка хомуйан, Бүлүү детдомугар 500 солк., Усть-Нера детдомугар 150 солк., пионерскай обелиск туруоруутугар 120 солк., «АЯМ-ҥа пионерскай кыһамньыны» акция чэрчитинэн итии таҥас (үтүлүк, кээнчэ тигэн) 2 посылканы ыыппыппыт. Пионердар сэриигэ ѳлбүт буойуннарга аналлаах памятнигы кытта шефтэһэллэрэ, хаарын күрдьэллэрэ, кырдьаҕастарга тимуровскай кѳмѳ оҥороллоро, «Кыымчаан» детсад оҕолоругар оонньуур тигэн бэлэхтииллэрэ, концерт кѳрдѳрѳллѳрѳ, производство бастыҥнарын кытта кѳрсүһэллэрэ, пионерга ылаллара, совхоз сүѳһүлэригэр анаан оскуолаҕа гидропон үүннэрэн кѳрѳллѳрѳ-харайаллара.
Саас аайы «Зарница» военнай-спортивнай оонньуу ыытыллара, Ленинскэй нэдиэлэҕэ 3-с кылаас оҕолорун пионерга ыларбыт. Дружина бастыҥ пионердара знамя таһыгар хаартыскаҕа түһэллэрэ, делегат быһыытынан улууска сбордарга, араас мероприятиеларга кытталлара.
Алын кылаас оҕолоругар октябреноктарга үлэ эмиэ былааннаахтык барара. Пионердар баһаатайдыыллара, араас күрэхтэри, оонньуулары ыыталлара, 1 кылааска октябренокка, 3 кылааска пионерга киирэллэрэ.
1986 сыллаахха Улуу ϴктѳѳп 70 сылын кѳрсѳ Бүтүн Союзтааҕы «Октябрята по стране Октября» диэн оонньуу сыл устата ыытыллыбыта. Күһүн ϴктѳѳп күнүгэр оонньуу старта бэриллибитэ. Хас биирдии кылаас экипаж буолар. Октябрятскай сборга экипажтар эмблемалаах, речевкалаах, ырыалаах хаамсаллар. «Совет друзей октябрят» председателэ Аня Комиссарова рапорт биэрэр. Старшай пионербаһаатай бу сыл устата ыытыллар Бүтүн Союзтааҕы оонньуу туһунан кэпсиир, экипаж командирдарыгар пропуск уонна маршрутнай илиис биэрэр. Бу маршрутунан ыытыллар үлэ дневниктээх буолуохтаах.
1. Володя Ульянов оҕо сааһыттан биир күн.
2. Харыстанньаҥ буолуу октябрятскай рейдэтигэр кыттыы.
3. «Түннүк» октябрятскай пресс-центр үлэтигэр кыттыы.
4. «Октябрятские минутки в трудовой час страны Октября» оонньууга кыттыы.
Оччотооҕу пионердар билигин ол дьоллоох кэмнэрин күндүтүк саныыллар. Мин баһаатайдыыр кэммэр завуһунан үлэлээбит Тарасова Зинаида Давыдовна ахтыытыттан: «Кыһыл хаалтыс тѳлѳнѳ… Элбэх оҕо дьоллоох оҕо сааһа бу тѳлѳнүнэн күѳдьүйэн хаһан да умнуллубаттык, дьиктитик аастаҕа. Онуоха баһаатай Прасковья Сидоровна үтүѳтэ улахан…»
Лена Слепцова.