Учуутал – хас биирдии киһиэхэ үөрэх киэҥ эйгэтин арыйбыт, билии биэрбит киһи буолар. Бэйэтин идэтин толору баһылаан, өйүн-санаатын, билбитин-көрбүтүн үөрэнээччилэригэр тиэрдэн үтүө дьону үүннэрэн таһаарар.
Оннук учууталлартан биирдэстэрэ – таҥараттан бэриллибит талааннаах омук тылын учуутала Алла Семеновна Колесова буолар. Кини миигин бэһис кылаастан үөрэппитэ. Алла Семеновна уруоктара олус сэргэх уонна киһи өйүгэр хаалар гына буолаллара. Наһаа өйдөөн хаалбыппын глагол «to be» тематын бары бэркэ билэр “В лесу родилась елочка» ырыабытынан ыллатан үөрэппитин. Кини уруоктара оонньуу курдук бэһиэлэйдик ааһаллара. Бэйэтэ мэлдьи үөрэ сылдьар, омук учууталын быһыытынан англичанкалар курдук уратытык таҥна сылдьара көрөргө астык буолааччы. Хас биирдии оҕоҕо туспа сыһыаннааҕа, үөрэтэр методиката оонньуу быһыытынан ураты буолара.
2003-2004 сс., биһиги оскуоланы бүтэрэр сылбытыгар Алла Семеновна директоры иитэр үлэҕэ солбуйааччынан бэрт таһаарыылаахтык үлэлээбитэ. Ол сыл Алла Семеновна салайыытынан оскуолабыт 100 сыллаах үбүлүөйүн көрсө оскуола таһын оҕолор, учууталлар кырааскалаабыппыт. Ону таһынан туох баар тэрээһиннэрбит бэрт чаҕылхайдык, киһи өйүгэр иҥэн хаалардыы ааһар буолбуттара. Бу барыта Алла Семеновна идеятынан буолаллар этэ, билиҥҥи олохпутугар үчүгэй өйдөбүлү хаалларбыта.
2018-2019 сс. учууталбын кытта олохтоох библиотекаҕа бииргэ үлэлиир чиэскэ тиксибитим. Онно чугастык алтыһан үрдүк таһымнаахтык, элбэх ситиһиилэрдээхтик үлэлээбиппит. Алла Семеновна бэйэтигэр дьону тардар, тылыгар киллэрэр талааннаах. Кини эттэ даҕаны бары түмсэ түһэллэр, тугу эппитин ылынан толорон бараллар. Библиотекаҕа үлэлиир кэмигэр омук тылын сайыннаран, проект суруйан «I speak English» кружок арыйан үрдүк таһымнаахтык үлэлэппитэ. Үөрэтэр оҕолоро астына-астына кэлэллэрэ. Кини бэйэтэ творческай уонна ирдэбиллээх буолан оҥорбутун, саҕалаабытын барытын үтүө түмүккэ тиэрдэр. Хас биирдии библиотека тэрээһиннэрэ чаҕылхайдык ааһаллара. Араас куонкурстары тэрийэрэ, литературнай биэчэрдэри, спектакллары кытта туруорара. Алла Семеновна миэхэ учууталым уонна уһуйааччым буолбута. Саамай үчүгэй хаачыстыбата – ылсыбыт дьыалатын ымпыгар-чымпыгар тиийэ быһаарсан туйгун түмүккэ тиэрдэрэ. Билигин Алла Семеновна Арыы Толоон оскуолатыгар таһаарыылаахтык үлэлии сылдьар. Куйаар ситиминэн кини үөрэнээччилэрин ситиһиилэрин көрөн үөрэбин. Оскуола иһигэр «Гарри Поттер биэчэрин” олус бэркэ ыыппыта, оҕолор төһө эрэ астыннахтара. Кини туруорар тэрээһиннэрэ куруутун аныгы олох хаамыытынан, оҕолор интириэстэрин таба тайанан буолаллар. Мин бэйэбин дьоллоох киһинэн ааҕынабын, маннык үчүгэй учууталга үөрэммиппитэн уонна тэҥҥэ үлэлээбиппиттэн. Киниттэн элбэххэ үөрэнним, үлэ үтүмэн албаһын ылбытым. Баҕарыам этэ Алла Семеновнаҕа уһун дьоллоох олоҕу, кытаанах доруобуйаны, махталлаах үөрэнээччилэри. Туппутуҥ тупсан истин, ылсыбытыҥ үтүө түмүктээх буоллун!
Л. Л. Холмогорова аатын сүгэр Байаҕантай олохтоох библиотекатын сүрүннүүр библиотекаря Инна Никитина