Саха Республикатын үтүөлээх учуутала, Российскай Федерация уопсай үөрэхтээһин бочуоттаах үлэһитэ, «Гражданскай килбиэн» анал бэлиэ хаһаайына, 54 сыл педагогическай ыстаастаах, үлэ уонна спорт бэтэрээнэ Галина Афанасьевна Барашкова сырдык кэриэһигэр анаммыт оскуола оҕолоругар саахымакка биирдиилээн бастыыр иһин турнир Кириэс Халдьаайы орто оскуолатыгар ыытылынна. Галина Афанасьевна бу оскуоланы бүтэрбит оҕолортон бастакы үрдүк үөрэхтээх математик уонна үлэтин эмиэ Кириэс Халдьаайы оскуолатыттан саҕалаабыта.
2018 сылтан ыла Арыы Толоон оскуолатыгар, олохтоох дьаьалта өйөбүлүнэн (баһылык — Л. Д. Голикова), саахымакка үөрэнээччилэр ортолоругар биирдиилээн бастыыр иһин күрэхтэһиини тэрийэн ыытыыны са5алаабыта. Бу үтүө үгэһи сал5аан аны турнир «Г. А. Барашкова бирииһигэр» диэн ааттанар буолла. Саахымат о5о өйө — санаата, толкуйдуур дьоҕура сайдарыгар улахан өҥөлөөҕүн билэбит. Ол да иһин бастакы Президеммыт М. Е. Николаев оскуола ахсын саахыматы үөрэтиини киллэриини кө5үлээбитэ.
Күрэхтэһиигэ 46 о5о кыттыбыта киһини үөрдэр. Бу биһиги нэһилиэкпитигэр умнуллан эрэр спорт көрүҥэ хаттаан сайдарыгар эрэли сахта.
Кириэс Халдьаайы оскуолата (директоры иитэр үлэҕэ солб. — М. П. Габышева) турниры кыайа-хото тутан тэрийдэ. Арыы Толоон оскуолатын директора В. П. Слепцов Галина Афанасьевна Барашкова олоҕун-үлэтин сырдатта. Күрэхтэһии кыттааччыларын оройуон Сэбиэтин депутата А. А. Павлов, аймахтарын ааттарыттан Р. П. Степанова, күрэхтэһии кылаабынай судьуйата Т. М. Заболоцкая э5эрдэлээтилэр, ситиһиини ба5ардылар.
Күрэхтэһии 3 бөлөҕүнэн барда. Алын кылаас оҕолоругар кыайыылаахтарынан буоллулар: кыргыттарга- Колодезникова Милана- 1, Тарабукина Дуня- 2, Колодезникова Айсаара- 3 миэстэ ( бары Кириэс Халдьаайы оскуолатын үөрэнээччилэрэ). Уолаттарга бу бөлөххө 12 о5о кытынна. Биир эрэ хотторуулаах, 10 очколаах Слепцов Сарыал (Кириэс Халдьаайы оскуолата) эрэллээхтик бастаата, утумнаахтык дьарыктанна5ына кэскиллээх оонньооччу тахсыыһы. Иккис миэстэҕэ — Үөгэн оскуолатын үөрэнээччитэ Савелий Слепцов тигистэ. Үһүс миэстэҕэ тэҥ очколаах икки оонньооччуттан хаачыстыбанан Даниил Мегинов та5ыста.
Ортоку бөлөххө миэстэлэри маннык үллэһиннилэр. Кыргыттарга: 1 миэстэ- Заболоцкая Тапталлаана, 2 — Никифорова Яра, 3 — Потапова Айта. Уолаттарга: 1 миэстэ — биир эрэ тэҥнэһиилээх, утарсааччытын барытын хоппут Марков Ньургун (Үөгэн оскуолата), 2 — Матаркин Дьулус, 3 — Руфов Руслан.
Улахаттарга (кыргыттарга) — Слепцова Сайаана-1 миэстэ, Тимофеева Анжелика (Арыы Толоон оскуолата) — 2 миэстэ, Колодезникова Веронида — 3 миэстэ буоллулар. Уолаттарга: Тегюрюков Володя бастаата, иккискэ- Костромыкин Ариан (Арыы Толоон) тигистэ. Үһүскэ — Стручков Саша та5ыста.
Кыайыылаахтар бары мэтээлинэн, грамотанан наҕараадаланнылар уонна харчынан бириэмийэ туттуллар. Спонсордарынан буоллулар: Нь. И. Барашков, аймахтара, олохтоох дьаһалта уонна Арыы Толоон оскуолата.
Саахымакка Г. А. Барашкова бирииһигэр күрэхтэһии сылын аайы ыытыллыа.
Алексей Павлов.