Н.Е.Мординов-Амма Аччыгыйа аатынан «Кэскил» оҕо бэчээтин кыһата ый аайы оскуола саастаах оҕолорго таһаарар «Бэлэм буол» сурунаал балаҕан ыйынааҕа нүөмэрэ Томпо оройуонугар ананна. Сурунаал 1001 экземпляр тираһынан бэчээттэннэ.
Сурунаал бастакы сирэйигэр оройуон баһылыга Я.И.Степанов: «Эн олорор улуускар, нэһилиэккэр Дьабарыкы Хайа таас чоҕо тиэллэн тиийэн, кыһын устата дьиэҕин-уоккун сылааһынан хааччыйара буолуо. Томпо Нежданинскайыгар хостонор кыһыл, үрүҥ көмүс модун Россия күүһүн-кыаҕын бөҕөргөтөр», — диэн киирии тылынан саҕаланар.
Сурунаал «Айанньыт», «Чахчылар», «Дойдум номоҕо», «Дойдум киэн туттуута», «Кэрэ-бэлиэ сирдэр», «Төрүччү», «Тоттук», «Ааҕымта», «Эрчим», «Иэйии» рубрикалардаах. Ол курдук, «Айанньыт» рубрикаҕа ойууламмыт картаҕа оройуон киинин, нэһилиэктэрин ааттара, сирин иэнэ, олорор киһи ахсаана, оройуоҥҥа хайдах, тугунан айаннаан тиийэр туһунан кылгастык сырдатыллыбыт. «Кэрэ-бэлиэ сирдэр» рубрикаҕа Мамонт хайатын, НЛО быһыылаах дьиэ, Эйфелевай башня, күрүлгэннэр, «ОДО» туристическай база туһунан иһитиннэрии киирбит.
Томпо оройуона Саха сиригэр промышленность сайдыытыгар биир баста-кынан кыттыспыта. Ол сайдыытын туһунан «Томпо сирин баайа», «Томпо уонна промышленность» диэн тэттик ыстатыйалар суруллубуттар. Көмүс промышленноһын сайдарыгар М.П.Тарабукин, Г.П.Ефимов , Ф.В.Павлова о.д.а. ааттара устуоруйаҕа ааттанар.
«Ааҕымта» балаһаҕа киэн туттар суруйааччыларбыт Егор Неймохов “Хапсыһыы» сэһэниттэн быһа тардыы, Анастасия Сыромятникова «Хопто» кэпсээниттэн быһа тардыы эдэр ааҕааччылар болҕомтолорун тардар. Анал куйаар куодунан Е.П.Неймохов аатынан Мэҥэ Алдан орто оскуолатын, А.С.Сыромятникова аатынан Арыы Толоон сүрүн оскуолатын туһунан билиэххэ сөп.
«Төрүччү» сирэйгэ III Байаҕантай нэһилиэгэр олорон ааспыт Бравиннар аҕа уустарын туһунан кэпсэнэр.
«Эрчимҥэ» спорт эйгэтигэр киэн туттар биир дойдулаахтарбыт Иннокентий Свинобоев –Тыыннаахап, Виктор Лебедев, Сергей Фролкин, Дмитрий Саввин, Валерия Винокурова ситиһиилэрэ суруллубут.
Сурунаал тас сирэйин уруһуйун Алина Монастыршина оҥордо. Тиэкиһи Саһыл орто оскуолатын 10 клыааһын үөрэнээччитэ Алеша Уткин аахта.
«Бэлэм буол» сурунаалы аан бастакынан үөрэх салалтатын аатыттан Хаандыга орто оскуолатын саха кылааһын үөрэнээччилэрэ бэлэх туттулар.
Үөрэнээччилэр төрөөбүт улуустарын туһунан эбии ааҕан, билиилэрин хаҥатыахтара диэн бигэ эрэллээхпит.
Лена Слепцова