Муус устар 9-10 күнүгэр дьоллоох Дьокуускай куоракка С.А.Зверев-Кыыл Уола күнүгэр аналлаах өрөспүүбүлүкэтээҕи «Тоҕус оһуордаах түһүлгэ» 900-тэн тахса кыттааччыны Дьокуускай куоракка түмтэ.
Бу күрэх чэрчитинэн , биир түһүлгэ «Тыл сүмэтэ» көрүү күрэһэ үрдүк таһымҥа ааста. «ТЫЛ СҮМЭТЭ» күрэххэ кыттааччы үс көрүҥү : хоһоон, үгэ, чабырҕаҕы толору баһылаан толорор ураты түһүмэҕэ.
Тэрээһин сүрүн спонсора «Арктик Капитал» тэрилтэ, салайааччыта Матвей Евсеев уонна Сунтаар улууһун дьаһалтата.
Икки күннээх күрэскэ анаан-минээн Үөһээ Дьааҥы, Уус Алдан, Ньурба, Сунтар, Лиэнискэй, Таатта, Нам, Мэҥэ Хаҥалас, Амма, Орто Халыма ,Томпо улуустарыттан уонна Дьокуускай куораттан 72 кыттааччы, ол иһигэр 21 оҕо, 51 улахан дьон кытыннылар. Оҕолорго 1 бөлөҕү, улахан дьоҥҥо 6 бөлөҕу, уопсайа 78 нүөмэри дьүүллүүр сүбэ сыаналаата.
Дьүүллүүр сүбэҕэ үлэлээтилэр:
— Наталья Владимировна Михалева-Сайа, СӨ норуодунай суруйааччыта, СӨ култууратын үтүөлээх үлэһитэ, Сунтаар улууһун Ытык олохтооҕо, Саха национальнай көрдөрөр-иһитиннэрэр хампаанньа эрэдээктэрэ
— Афанасий Гаврильевич Гуринов -Арчылан, СӨ суруйааччыларын сойууһун чилиэнэ, СӨ норуодунай бэйиэтэ Иван Гоголев-Кындыл аатынан бириэмийэ лауреата, “Күрүлгэн” уус-уран сурунаал сүрүн эрэдээктэрэ
— Ульяна Дмитриевна Попова — Сунтаар улууһун дьокутааттарын сэбиэтин бэрэсэдээтэлэ
Томпо
Бу улахан түһүлгэҕэ биһиги нэиһилиэкпититтэн, Томпо улууһун чиэһин Алеша Уткин ( салайааччылара Наталья Мярина, Сардана Сидорова ) үрдүк таһымнаахтык кыттан көмүскээтэ.
Күрэххэ Алеша ийэтэ Наталья Христофоровна бэлэмнээбит Моисей Ефимов «Мин сахабын » уонна Рафаел Баҕатаайыскай «Суор уонна тоҥсоҕой » үгэтин аахта. Маны таһынан, учуутала Сардана Константиновна Сидорова А.Е.Кулаковскай- Өксөкүлээх Өлөксөй «Саха дьахтарын сэттэ мэтириэтэ» айымньытынан туруорбут чабырҕаҕын толордо.
Түмүккэ ,Алеша ,чахчы айылҕаттан бэриллибит талба талаанын ийэтэ Наталья Христофоровна үгүс сыллар устата, дьаныһан туран дьарыктаан,уһуйан таһаарбытын өйүгэр-санаатыгар иҥэринэн, бу улахан түһүлгэҕэ , дьоҥҥо-сэргэҕэ , киэҥ түһүлгэҕэ көстөн ,дьүллүүр сүбэ биһирэбилин, үодүк сыанабылын ылла.
Дьүүллүүр сүбэҕэ үлэлээбит, Афанасий Гаврильевич Гуринов-Арчылаан: «Алеша, маладьыас! Эн Саха Өрөспүүбүлүкэтин үтүөлээх артыыһа, биллиилээх киһи буолуон! «-, диэбитэ элбэҕи этэр, инникигэ эрэли үөскэтэр.
Алешаҕа үрдүк ситиһиилэри, олоххо табыллыыны ис сүрэхтэн баҕарабыт!
Сидорова С .К. Саһыл орто оскуолатын дириэктэрин иитэр үлэҕэ солбуйааччы